Ánte Veijola

Ánte lii šoddâm Oulust. Suu suuhâ lii Ucjuuvâst vuálgus. Ánte lohá tääl talhâstiettuu Oulu ollâopâttuvâst. Suu naver lii porgâđ tuáhtárin sämikuávlust tast maŋa ko sun valmâštuvá. Ánten teháliih ääših láá suu peerâ, máhđulâšvuotâ peessâđ vaiguttiđ aššijd, uápuh já Ucjuuvâ tuoddâreh sehe juuvah. Sun maainâš-uv, ete läävee astoäigipuđâldâssân pivdeđ Veččijuuvâst.

Ánte lii huolâst tast, mon uccáá válduaalmugist lii tiätu sämmilijn. Suu mielâst ličij tehálâš, ete sämiaašijn máttááttuuččij eenâb škoovlâin, amas sämmiliih tarbâšiđ toimâđ kulttuurtulkkân. Meiddei kaavpugsämmilij ääših láá Ánte mielâst.  “Mun tuáivuččim, ete nuorâirääđi pastaččij pyehtiđ säminuorâid oohtân. Kaavpugist šoddâm nuorrân mun lam huámášâm mon suotâs lii peessâđ sárnuđ sämikielâ eres nuorâiguin, ko om. škoovlâst iäráseh iä sáárnu sämikielâ. Eromâšávt De!-haavâ ornim nuorâitábáhtusâin mun lam ilolâš.”

Nuorâirááđán Ánte lii servâm tondiet, ete politiik kiäsut suu já nuorâirääđi lii šiev vyehi uápásmuđ sämipolitiikân pyerebeht. Puáttee nuorâirääđi jesânáid sun vuolgât tiervuođâid: “Lii pyeri mušteđ, ete nuorâirääđi lii säminuorâi várás já tábahtusâi ornim nuoráid lii siämmáá tehálâš ko vâik vaiguttem staatâ tääsist. Nuorâirääđist piäsá porgâđ pooliitlij aašijguin, jis haalijd, tâi orniđ nuoráid tooimâid teikâ kuohtuid.”

Motto: Kannât ruokkâdávt riemmâđ puoh uđđâ aššijd mieldi.