Anni-Sofia Niittyvuopio

Mun lam Sofe Hánssa Sampo Ánne–Sofe, Anni–Sofia Niittyvuopio. Mun lam vuálgus Kärigâšnjaargâst já muáddi ive aassâm oppeet tääbbin uápui maŋa. Mun tooimâm nube paje
nuorâirääđi saavâjođetteijen.

Tááláá mun poorgâm sämikielâi máttááttâssáin, siämmást ko lam fáárust politikist já puásuituálust. Eromâšávt alda vááimu láá sämikielâ máttááttâs, sämitiätu já algâaalmugij vuoigâdvuođah šoŋŋâdâhnubástuskoččâmušâin.

Mun vuolgim fáárun Suomâ säminuorah rs. tooimân 13–ihásâžžân já tobbeen puálu vaaigutmân lii vuálgám. Mun lam meid toimâm kulmâ ive Čižetlito piäládâhváldálâžžân, kost mun luptiim aktivlávt sämiaašijd uáinusân. Mun oskom, et mun šoodâm vala kuhháá vaiguttiđ já porgâđ sämiašijguin.

Mun halijdiččim aainâs, et nuorâirääđist lii luándulâš savâstâllâmkoskâvuotâ väldiaalmug nuorâivaigutteijeiguin. Oovtâstpargoost lii vyeimi já oovtâstpargo eres nuorâiguin lii nuorâirááđán luándulâš. Nuorâirääđi lii čeppi olleeđ jieijâs ulmijd, mon mun jieš huámášim eromâšávt šoŋŋâdâhnubástusân kyeskee aašijn. Kyehti ive tassaaš mij asâttijm ulmen nanodiđ säminuorâi sajaduv šoŋŋâdâhnubástussavâstâlmijn já mij luhostuim tast pyereest. Iäráseh, eromâšávt nuorah, láá halijdâm kuullâđ säminuorâi uáinuid.

Nuorâirääđist finnee tivrâs tááiđuid toimâđ vaigutteijen já piäsá čuávvuđ alda sämipolitikkárij já virgehaldâšeijei pargoid. Nuorâirääđist ovtâstuveh sämisiärváduv pyeremusah peleh, vaiguttem, fáádáh main jieškii–uv movtijdum, tego tuoijum, máttááttâs, iäláttâsah tâi nuorâipargo, já porgâm keevâtlii tääsist iärásij lasseen pargopáájái já nuorâipeeivij häämist.