Leena Fofonoff

Leena lii Čevetjäävrist meddâl.

Mun lam Leena Fofonoff, 23, já aasâm tääl Ruávinjaargâst. Mun lam Čevetjäävrist meddâl já tobbeen eellim jieččân pärnivuođâ. Vâik eellim lii-uv tääl tääbbin kaavpugist, te munjin lii tehálâš peessâđ ain kolliđ päikkikuávlust.

Mun poottim Ruávinjaargân luuhâđ já valmâštuvvim áámmátluvâttuvâst aldatipšon. Masa jo tállân valmâštum maŋa peessim paargon párnáikáárdán. Párnái já nuorâi ääših láá muu vááimu alda já tondiet halijdâm leđe mieldi nuorâirääđist-uv. Mun lam värijeessân já taat paje lii munjin kuálmád. Taan mield mun peesâm vaiguttiđ já ovdediđ sämipárnái já -nuorâi aargâ ain ovdâskulij já lasettiđ tiäđuid mist válduaalmugân. Mun halijdâm leđe mieldi hammiimin pyereeb puátteevuođâ mijjân puohháid, nuuvt pyereest ko jieččân uásild pastam.

Nuorâirääđist piäsá porgâđ maaŋgâpiälálii ohtsâšpargo nuuvt aalmugovdâsteijeiguin ko eres nuorâiraađijguin. Taan lasseen lii ohtsâšpargo eres algâaalmugnuorâiguin. Lii hirmâd tehálâš peessâđ jyehiđ ferimijd tast, maht oro kuullâđ ucceeblohon. Tondiet mun avžuuttâm-uv uđđâ nuoráid uuccâđ nuorâirááđán!

Puátteevuođâ iähtun mun lam huolâst šoŋŋâdâhnubástusâst já sämikielâi já -kulttuur siäilumist, eromâšávt nuorttâlâškielâ puotâ. Mij tarbâšep maaŋgâlágán tooimâid ton oovdân, ete šoŋŋâdâhnubástus ij ovdániččii nuuvt jotelávt. Toos mij pyehtip vaiguttiđ sehe ovtâskâs ulmuu tääsist ete politiikast. Kielâ já kulttuur siäilumist-uv juáhháš mist lii tehálii roolist! Mij kolgâp tipteđ mii kielâ kulluđ já čuoijâđ, kevttiđ sämimáccuhijd räämist, sárnuđ puásuituálu já kyelipivdo tiileest já sirdeđ kietâtyejitááiđuid ovdâskulij. Čäittip puohháid, ete tääbbin mij lep já eellip epke ááigu luovâttiđ vâik vädisvuođah puátih-uv!