Nuorâirääđi čuákkim 6/2019

Nuorâirääđi čuákkim 6/2019

Nuorâirääđi čuákkimistiji 12.12.2019 majemuu tove taan toimâpaajeest. Čuákkim äššilistoost lijjii il. toimâvuávám já budjetarvâlus tuhhiittem já iävtuttâs jesânijn, kiäh väljejuvvojeh nuorâirááđán. Iävtuttâs mana Sämitige stiivrân já ain vijđásubboht Sämitige olesčuákkimân. Ton lasseen nuorâirääđi savâstâlâi vaaljâpaje uulmij olášuumeest. Nuorâirääđi tuálá ivveest 5-6 čuákkim já taan tove čuákkim tollui Skype peht.

Toimâvuávám 2020

Iivij 2020-2021 nuorâirääđi asâttuvvoo Sämitige čuákkimist ive 2020 aalgâst. Nuorâirääđi jesânáid lii ulmen orniđ jo paje aalgâst škovliittâs Sämitige tooimâin já siämmást uápásmâđ nuorâirääđi sajattâhân Sämitiggeest já meiddei nuorâirääđi toimáid já havváid.

Nuorâirääđi valmâštâl vaaljâpaje aalgâst säämi nuorâipooliitlii ohjelm, mon ulmen lii ovdediđ säminuorâi vuoigâdvuođâid jieijâs kielân já kulttuurân. Teháliih teemah ohjelm valmâštâldijn láá säminuorâi hastâlusah juátkiđ ärbivuáválij iäláttâsâiguin já šoŋŋâdâhnubástus, säminuorâi pyereestvaijeem, seksuaal- já mielâtiervâsvuotâääših, sämikielâlii nuorâikulttuur ovdedem já digitaallâš nuorâipargo, já ton lasseen sämikulttuur já tiäđui lasettem válduaalmugân sämmilijn.

Ive 2020 nuorâirääđi viggá ohtsâšporgâđ eenâb eres algâalmugijguin almugijkoskâsávt já viggá ovdediđ ohtsâšpargo Taažâ já Ruotâ sämitiigij nuorâirađijguin. Säämi parlamentaarlii rääđi (SPR) nuorâilävdikode Taažâ já Ruotâ sämitiigij nuorâirađijguin. Säämi parlamentaarlij rääđi (SPR) nuorâilävdikode saavâjođettemvuáru lii sirdum Suomâ Sämitige nuorâirááđán já nuorâirääđist lii válduoovdâsvástádâs konferens orniimist. Konferens uárnejuvvoo Anarist porgemáánust. Konferens valmâštâlmeh láá algâttum já konferens teeman lii väljejum šoŋŋâdâhnubástus. Nuorâirääđi tieđeet konferensist ko valmâštâlmeh ovdáneh.

Säminuorâi pyereestvaijeem áiguh ovdediđ nuuvt, ete juátkih ohtsâšpargo Aalmuglittoin, (Väestöliitto) já pyevtitmáin fáádán lohtâseijee materiaal nuorâirääđi tiätujyehim- já ravvimpalvâlusân. Ulmen lii meiddei orniđ škovlim säminuoráid. Nuorâirääđi lii meiddei mieldi KeesiČuõvv-kulttuuroholoopâ orniimist vâi pasteh tuárjuđ já nonniđ sämikuávlu ulguubeln ässee säminuorâi identiteet. Tábáhtus láá vuávám orniđ kiđđuv 2020. Nuorâirääđi viggá orniđ ohtsâšpargoost sämikuávlu kieldâiguin, sämiservijguin já sämitábáhtusâiguin säminuoráid tooimâid, moid lii älkkee servâđ. Tooimah olášuttojeh De-haavâ vuáđuld já toh ovdedeh sämikielâlii nuorâikulttuur.

Nuorâirääđist láá joođoost ive 2020 kyehti haavâ:

Dihtosis- Sämikulttuur uápisin

Nuorâirääđi lii uážžum Máttááttâs- já kulttuurministeriöst 53 800 € stuárusii ruttâdem Dihtosis-škovlâkolliimeh -haahân áigádâhân 1.7.2019-30.6.2020. Haahâ olášuvá oovtâst Nuorâi Akatemiain. Haavâ peht viggeh toohâđ sämmilijd já sämikulttuur uápisin válduaalmugnuoráid. Haavâ nube ive škovlâkolliimij várás peividuvvoo jo valmâš materiaal, olâšuttojeh škovlâkolliimeh já pargopáájáh, main nuorah peesih uásálistiđ, já ráhtoo mobiilspeelâ sämifáádást. Mobiilspellâ almostittoo sämmilij aalmugpeeivi eennâmviijđásávt Suomâ škoovlâin.

DigiÁrran 

Nuorâirääđi lii uážžum Laapi kuávluhaldâttâstoimâttuvâst (AVI) DigiÁrran-haahân 21 500 € ruttâdem, mon kalga kevttiđ áigáduvâst 1.12.2019-30.11.2020. DigiÁrran-haahâ viggá kavnâđ digitaal nuorâitooimâ maali sämikuávlust. Ive 2020 tiätujyehim- ja ravvimsiijđoh ovdeduvvojeh ain. Säminuorâid viggeh uážžuđ mieldi siijđoi ovdeedmân já siskáldâs pyevtitmân. Digitaal nuorâipargoost kalga väldiđ huámášumán nuorâi vuoigâdvuođâ jieijâskielâlii digitaalkulttuurân. Sämikielâlâš já säminuoráid uáivildum nuorâi tiätujyehim- já ravvimpalvâlus lii ovdil váilum ollásávt.