Ánte Veijola

Ánte tuåimmai jooʹtti tuåimmjempââʹjest nuõrisuåvtõõzz vääʹrrsaaǥǥjååʹđteeʹjen.

Ánte lij šõddâm Oulu-gåårdest. Suu sooǥǥâs lij Uccjooǥǥâst. Ååʹn son mättʼtââtt taalkâstiõtti Oulu pââimõs-škooulâst. Suu niõǥǥõssân lij valmštõõvvmõõžž mâŋŋa tuåimmjed dåhttren sääʹmvuuʹdest. Ánte miõlâst tääʹrǩmõš ääʹšš liâ jiijjâs piâr, vueiʹtlvažvuõtt piâssâd vaikkted aaʹššid, mättjummuž da Uccjooǥǥ tuõddâr da jooǥǥ. Õhttân staarjõõzzin son-i peäggat kueʹllšeellmõõžž Vetsijooǥǥâst.

Ánte âânn huõl väʹlddnarood väänas sääʹmtieʹttemvuõđâst. Suu miõlâst leʹčči samai tääʹrǩeš, što sääʹmaaʹššin mättʼteʹčeš jeänab škooulin, što ij säʹmmlain taarbšeʹči tuåimmjed kulttuuʹres duumšeeʹǩǩen. Ánte smeâtt še gååradsäʹmmlai aaʹššin. ” Tuäivčim što nuõrisuåvtõs vuäitči noorrâd sääʹmnuõrid õʹhtte. Gåårdest šõddjen leäm vuâmmšam mäʹhtt fiin äʹšš lij piâssâd mainsted sääʹmǩiõll jeeʹres nuõrivuiʹm, ǥu ouddm. škooulâst järraz jiâ maainâst sääʹmǩiõl. Jeäʹrben De!-haʹŋǩǩõõzz riâššâm šõddmõõžžin nuõrid leäm rämmai.”

Nuõrisuåvtõʹsse Ánte lij vuâlggam mieʹldd, ǥu politikk ǩeäss suu miõl da nuõrisuåvtõs lij pueʹrr vääll piâssâd tobstõõttâd sääʹmpoliitiʹǩǩe âʹlddlubun. Puõʹtti nuõrisuåvtõsniiʹǩǩid son vuõlttad tiõrvʼvuõđid: “Lij šiõǥǥ muʹštted što nuõrisuåvtõs lij sääʹmnuõri diõtt da šõddmõõžži riâššmõš nuõrid lij samai tääʹrǩes ǥu håʹt vaikktummuš valdia tääʹzzest. Nuõrisuåvtõõzzâst peäss tuejjeed politiikk, jõs tõʹst lij älšmam, leʹbe riâššâd nuõrid tuåimmjummuž leʹbe kuhttuid.”

Motto: Kaʹnnat tuõsttlõnji vueʹlǧǧed juõʹǩǩ ođđ äšša mieʹldd.

Tutustu myös