Lappi nuõrifoorum da nuõri korona lexit plaanummuš

Sääʹmtiiʹǧǧi nuõrisuåvtõõzz koččuš vueʹssmannu aalǥâst mieʹldd Lappi vuuʹd korona exit plaan raajjmõʹšše da čõõđ viikkmõʹšše. Lappi vuuʹd exit plaan raajjmõõžžâst liâ mieʹldd vuuʹd kuhttu puõccihåiddamvuuʹd, Lappi lett, di veʹrǧǧniiʹǩǩi lââʹssen vaiddsânji jeeʹres tuåimmjeei nuʹt mäddkåʹddtääʹzzest ǥu pääiklânji odm. turiismâst, jieʹllemvueʹǩǩtuåimmjummšest, vuuʹd mättjemstroiʹttlin da organisaatioin.

Exit plaan raajjmõʹšše tuåivvuš še nuõri vueiʹnnemkuuʹlm da jiõn. Lappi puõccihåiddamvuʹvdd vuõiʹni nuõri rool vääžnʼjen da tõn, što nuõr jiijj peäʹsse smiõttâd koronastaanni tuåimmjemnaaʹlid.

Määŋg rääʹjtõõzz jauʹǩǩe ǩieʹssmannu aalǥâst da tõõzz õhtteeʹl leäi huõll tõʹst, mäʹhtt meerla (ml. nuõr) silttee tuåimmjed ǩieʹssääiʹj koronastaanâld jeeʹres oummuid lokku vääʹldeeʹl. Lappi AVI nuõrituåimm kååččai vuäʹnkõs vaartõsaaiʹjin võl ouddâl ǩieʹssluõvâsvuõđ kooʹddi lääʹjjmeâldla nuõri vaaikteeijooukid da ämmatmättjemstroiʹttli mättʼtõõttikooʹddid vuäʹpsteeʹjineez Lappi Nuõrifooruuʹme.

Sääʹmtiiʹǧǧi nuõrisuåvtõs leäi Lappi AVI riâššmest Lappi nuõrifooruumâst õhttsažtuâjast kooʹddi nuõriväʹlddõõzzin da kååddlaž nuõrituâjain. Nuõri alttõõzz vuâđald Lappi puõccihåiddamvuuʹd vuõlttee pukid nuõrid tuejjuum  koronateâđtõõzz.

Nuõrifooruumâst altteeš uuʹccab tuâjj-joouk (LEXIT nuõr joukk) plaaneed õhttsai saǥstõõllmõõžži vuâđald nuõrid tuejjuum saaǥǥtummuž. Nuõrisuåvtõs lij mieʹldd tuâjj-jooukâst da lij põhttam toʹben õuʹdde jiijjâsǩiõllsa (sääʹmǩiõllsa) teâđtummuž da saaǥǥtummuž vääžnaivuõđ.

Vueʹlnn kaaunak vääžnmõs viiŋkid koronastaannʼja ǩeässa.

Lââʹssteâđ

Lappi vuʹvddvaaldâšmkoontâr nuõrituåimâst,
plaanraajji Susanna Lammassaari teʹl. 0295 017 383, risttnõmm.sokknõmm(at)avi.fi

Sääʹmteʹǧǧ,nuõripiisar Elli-Marja Hetta,

teʹl.  +358 50 382 5179, elli-marja.hetta(at)samediggi.fi

 

Vääznmõs viiŋk koronastaannʼja ǩeässa:

  1. Jeäʹl koronateeʹstin, jõs tuʹst liâ håʹt siõmmna fluuʹns leʹbe čåuʹjjkõõv õudldõõzz. Teeʹstid peäss hieʹlǩeld – ǩiõčč tääʹrǩab teâđaid jiijjad kååʹdd interneʹttseeidain.
  2. Koozz leʹbe kââšn põʹmmai nozvaireppka leʹbe jiijjad suåjju.
  3. Ââʹn huõl ǩiõđi põõssmõõžžâst leʹbe ǩiõđi desinfiâsttmõõžžâst määŋg vuâra peeiʹvest. Uʹcc ǩiõtt-tooidpoottâl jåått hieʹlǩeld kårmmnest!
  4. Vueiʹtlvažvuõđi mieʹldd ââʹn staankõõsk ouddmiârkkân ǥu jååđak kaaupin.
  5. Ââʹnnep huõl nuuʹbbin: jeäʹl kuõđđu õhttu, jeäʹl kueʹđ taaurõõžž õhttu!
  6. Seuʹrre koronaviirusteâđtõõzz ns. ”koronašõŋŋteâđtõõzz”. Koronavueʹǩǩ ij leäkku võl rääi, da tõn diõtt âlgg õõudâs seuʹrrjed vueʹjj õuddnem, jääʹǩǩted raʹvvjummšid da toiʹmmjed vaʹstteemnallšeld.
  7. Leäkku õõldâsoummuivuiʹm da taaurõõžživuiʹm da rämmaž ǩieʹzzest!

 

Ââʹnnep huõl nuuʹbbin õõutâst!

 

#koronalexitnuõr #koronašõŋŋteâđtõslappist #kstLappi

 

** Pââibeäʹlnn åårrai viiŋk liâ norrum Lappi puõccihåiddamvuuʹdi koronateâđtõõzzâst nuõrid.

 


Tobdstõõđ še