Ánte Veijola

Ánte lea dán bajis nuoraidráđi várreságadoalli.

Ánte lea bajásšaddan Oulus. Su sohka lea eret Ohcejogas. Dál son studere dálkkasdiehtagiid Oulu universitehtas. Son niegada das, ahte sáhtášii bargat skuvlla maŋŋel doavttirin sámeguovllus. Ántii dehálaš áššit leat iežas bearaš, vejolašvuohta beassat váikkuhit áššiide, oahput ja Ohcejoga duoddarat ja jogat. Oktan asttuáiggedoaibman son namuha guollebivddu Veahčáhis.

Ánte lea fuolastuvvan das, ahte váldoálbmot diehtá sámiin nu uhccán. Su mielas livččii dehálaš, ahte sámeáššiid birra oahpahuvvošii eanet skuvllain, amaset sápmelaččat dárbbašivčče leat iežaset kultuvrra ofelažžan. Maiddái gávpotsápmelaččaid áššit smiehtahit Ántte. ”Sávašin ahte nuoraidráđđi sáhtášii ovttastahttit sámenuoraid. Lean bajásšaddan gávpogis ja lean fuomášan man fiinna ášši lea beassat sámástit eará nuoraiguin, daningo omd. skuvllas earát eai sámás. Earenoamážit De! -fitnu lágidan nuoraiddáhpáhusain lean ilolaš.”

Nuoraidráđđái Ánte lea searvan, dasgo son lea beroštuvvan politihkas ja nuoraidráđđi lea vuogas vuohki beassat oahpásmuvvat sámepolitihkkii lagabus. Boahttevaš nuoraidráđi lahtuide son cealká dearvvuođaid: ”Lea buorre muitit ahte nuoraidráđđi lea sámenuoraid várás ja dáhpáhusaid lágideapmi nuoraide lea seamma dehálaš go ovdamearkka dihte váikkuheapmi stáhta dásis. Nuoraidráđis beassá politihkket, juos lea beroštuvvan das, dahje lágidit nuoraide doaimmaid dahje guktuid.”

Motto: Gánnáha roahkkadit vuolgit mielde buot ođđa áššiide.