Niila Rahko

Niila Rahko lea 28-jahkásaš nuorra, guhte lea eret Roavvenjárggas. Dál son ássá ja bargá Oulus. Niila lea buohccedivššár, gii lea čikŋon earenoamážit mielladearvvašvuođasuorgái. Asttuáigge son láve ee. ráhkadaddat elektronihka. Son niegada das, ahte sáhtášii skuvlet iežas sámegielat psykoterapevtan ja fárret sámeguvlui.

Niila lea leamaš nuoraidráđis mielde gitta dan vuođđudeami rájes. Son lea movttáskan váikkuhit sámenuoraid áššiide iežas stuorraoappá bokte.

“Sávašin ahte nuoraidráđđi sáhtášii váikkuhit sámenuoraid vuoigatvuođaide ja vejolašvuođaide doaibmat ja bargat iežaset gielain, sihke hárjehit iežaset kultuvrra friddja riikkaviidosaččat. Lean ilus das, ahte nuoraidráđđi lea lávdegoddi, mii váldojuvvo duođas, ja virggálaš orgánain stáhta dásis min áššiid duođalašvuohta áddejuvvo”, suokkarda Niila, go sus jerrojuvvo makkár áššiid son vuordá nuoraidráđi ovddidit dál ja boahttevuođas.

Dearvvuođat ođđa nuoraidráđi lahtuide: ”Muitet jáhkkit nubbi nubbái, ja muitet ahte lehpet buohkat bargamin seamma áššiid ovdii. Dorjot nubbi nuppi ja huksejehket oktasaš boahttevuođa árjjalaččat.”