Anni-Sofia Niittyvuopio

Mun lean Sofe Hánssa Sampo Ánne–Sofe, Anni–Sofia Niittyvuopio. Mun lean eret Gáregasnjárggas ja lean ássan dáppe fas moadde jagi oahpuid maŋŋá. Mus lea nubbi badji nuoraidráđi sátnejođiheaddjin.

Mun barggan dál sámegielaid oahpahusa olis, seammás doaimman politihkas ja boazodoalus. Erenomážit váimmu lahka leat sámegielaid oahpahus, sámediehtu ja eamiálbmogiid vuoigatvuođat dálkkádatrievdanáššiin.

Mun serven mielde Suoma sámenuorat rs doaimmaide 13–jahkásažžan ja doppe mus buollái hállu váikkuhit áššiide. Lean maid doaibman golbma jagi gurutlihtu bellodatváljaolmmožin, ja doppe čalmmustahtán aktiivvalaččat sámeáššiid. Mun jáhkán, ahte váikkuhan ja barggan vel guhká sámeáššiiguin.

Mun áinnas háliidivččen, ahte nuoraidráđis lea lunddolaš ságastallanoktavuohta eanetlogu nuoraidváikkuheaddjiiguin. Ovttasbarggus lea fápmu ja ovttasbargu eará nuoraiguin lea
nuoraidráđđái lunddolaš. Nuoraidráđđi lea čeahppi juksat iežas mihttomeriid, man ieš fuomášin erenomážit dálkkádatrievdama hárrái. Guokte jagi dassái mii ásaheimmet mihttomearrin nanosmahttit sámenuoraid sajádaga dálkkádatrievdanságastallamiin ja lihkostuvaimet das bures. Sámenuoraid oainnuid leat háliidan gullat, erenomážit eará nuorat.

Nuoraidráđis oažžu árvugas dáidduid doaibmat váikkuheaddjin ja beassá čuovvut lahka sámepolitihkkariid ja virgehálddašeaddjiid bargama. Nuoraidráđis ovttastuvvet sámeservoša buoremus bealit: váikkuheapmi, iešguđege olbmuid beroštumit, dego duodji, oahpahus, ealáhusat dahje nuoraidbargu ja dábálaš olbmuid bargan earret eará bargobájiid ja nuoraidbeivviid bokte.