Leena Fofonoff

Leena lea eret Čeavetjávrris.

Mun lean Leena Fofonoff, 23, ja orun dál Roavvenjárggas. Lean eret Čeavetjávrris ja doppe ledjen mu olles mánnávuođa. Vaikko mu eallin leage dál gávpogis, munnje lea ain dehálaš beassat fitnat jeavddalaččat ruovttuguovllu duovdagiin.

Bohten Roavvenjárgii studeret ja leange geargan ámmátlogahagas ja válmmaštuvven lagasdivššárin. Oalle fargga válmmaštuvvama maŋŋel ožžon barggu beaiveruovttus. Mánáid ja nuoraid áššit leat mu váimmu lahka ja danin háliidan leat nuoraidráđisge. Lean várrelahttu ja dáláš badji lea mu goalmmát. Dán mielde beasan váikkuhit ja ovddidit sámemánáid ja -nuoraid árgga ja lasihit dieđuid min birra váldoálbmogii. Háliidan leat mielde duddjome buoret boahttevuođa midjiide buohkaide, nu bures go iežan beales basttán.

Nuoraidráđi bokte beassá bargat máŋggabealat ovttasbarggu sihke riikkabeaiáirasiiguin ja eará nuoraidráđiiguin. Dása lassin mii gaskkohagaid ovttasbargat eará eamiálbmot nuoraiguin. Lea hui dehálaš beassat juogadit vásáhusaid das, mot orru gullat unnitlohkui. Dán dihte ávžžuhange ođđa nuoraid ohcalit nuoraidráđđái!

Boahttevuođa ektui mun lean fuolastuvvan dálkkádatrievdamis sihke sámegielaid ja -kultuvrra seailumis, earenoamážit nuortalaččaid buohta. Dárbbašit máŋggalágan doaimmaid dan ovdii, ahte dálkkádatrievdan hiđásmuvašii. Dasa sáhttit váikkuhit sihke indiviidda dásis ja politihkain. Giela ja kultuvrra seailumisge mis buohkain lea dehálaš rolla! Diktot giellamet gullot ja skádjat, geavahehkot čeavlájin gárvvuideamet badjelisttámet, hubmot boazodoalu ja guollebivddu dilis ja dolvot duddjondáidduid ovddos guvlui. Čájehehkot buohkaide, ahte dáppe mii leat ja eallit eatge áiggo vuollánit, vaikko bohtetge vuostegieđageavadagat!