Mii lii miettâm seeksist?
Seksuaallâš jiešmeridemvuoigâdvuotâ lii ohtâ seksuaalvuoigâdvuođâin, moh kyeskih mijjân puohháid. Toos lohtâs nonnâsávt miettâm: tust lii lope piettâliđ tavoin, moid tun jieh haalijd uásálistiđ. Seksuaallijd tavoid kalga ain leđe miettâm.
Miettâm uáivild tom, ete tun čááitáh ruánáá čuovâ kyeimi toimáid. Miettâm adelem váátá juátkoo viestâdem kuoimijn (tâi kuoimijguin). Maiden luámáttuvâid ij taarbâš vuáláčäälliđ – šiev vyehi pivdeđ miettâm kyeimist lii koijâdiđ ovdâmerkkân ”Uážum-uv kuoskâđ?” já ”Šadda-uv täst šiev tobdo?” Talle tust lii vuoigâdvuotâ västidiđ ”joo” tâi ”ij,” tâi vâik ”kenski,” jieččâd tubdâmušâi mield.
Jis tun jieh lah aaibâs vises ete lijkkuuh-uv toos, mii lii tábáhtuumin, kannât orostiđ savâstâllâđ já hundâruššâd. Nube tááhust miettâm puáhtá adeliđ tile mield meiddei čäittimáin, tego toin et tuáppee nube kieđâ teikâ nuáigistmáin uáivi.
Tehálumos lii, ete vuáruvaiguttâs tunnuu kooskâst tuáimá já ete ääših láá kuohtuid čielgâseh tavoi iähtun. Jis kiinii sirdá tuu kieđâ meddâl teikâ luvvá uáivis, sun ij addel tunjin miettâm. Talle tun koolgah kiäsádâttâđ.
Miettâm lohtâs sehe vuoigâdvuođáid ete kenigâsvuođáid. Pic et tust lii vuoigâdvuotâ piettâliđ seksuaallijn tavoin, tust lii meiddei kenigâsvuotâ pivdeđ kyeimist miettâm já kunnijâttiđ suu jiešmeridemvuoidâdvuođâ. Miettâm uážžum ohtii ij uáivild, ete tast maŋa tot taho ličij ain hiäivulâš. Miettâm kalga uážžuđ jyehi tove uđđâsist. Uáivádum, uáđđee tâi mudoi tiäđuttes olmooš ij pyevti adeliđ miettâm!
Teevstâ lává čáállám Aalmuglito nuorâipargojuávhust Vilja Luomala já Iida Yliannala. Tot kávnoo Aalmuglito blogist: Lupa koskea – mikä on suostumus (Lope kuoskâđ – mii lii miettâm)
Miettâm-video lii tekstejum puoh kuulmâ Suomâst sarnum sämikielân.