Sämitige 21 jesânid já nelji värijeessân väljejuvvojeh sämmilij kooskâst jyehi niäljád ive vaaljâin. Sämikuávlu jyehi kieldâst kalga valjiđ ucemustáá kulmâ ovdâsteijee Sämitiigán. Vaaljâin jienâsteh toh sämmiliih, kiäh láá merkkejum valjâluvâttâlmân. Jienâstemvuoigâdvuotâ addel meiddei vuoigâdvuođâ leđe iävtukkâssân. Čuávuvááh vaaljah uárnejuvvojeh 4.9-2.10.2023.
Sämitige vaaljah toimâttuvvojeh 4.9.-2.10.2023.
Valjâäššikirjeh toimâttuvvojeh jienâvuoigâdvuođâláid čohčâmáánu aalgâst poostâ peht kirjettum reivân.
Maht mun peesâm jienâstiđ?
Jis tun lah uuccâm valjâluvâttâlmân já uážžum jienâstemvuoigâdvuođâ, te vyerdi čuávuváid vaaljâid já jienâst! Puoh valjâluvâttâlmân merkkejum sämmiliih uážžuh valjâive poostâ mield almottâs jienâstemvuoigâdvuođâstis.
Jis oovdeb vaaljâi ääigi tun lijjih vala vuálá 18-ihásâš, mutâ tääl puávtáččih jienâstiđ, te tun koolgah uuccâđ čuávuvái vaaljâi valjâluvâttâlmân.
Sämitige valjâlävdikodde lii vuolgâttâm valjâluvâttâlmân ucâlume kooskâst muštottâsreeivâ 18 ihheed tiävdám nuoráid. Tun koolgah jieš leđe aktiivlâš já uuccâđ!
Ive 2023 vaaljah toimâțtuvvojeh postâjienâstmin 4.9-2.10.2023 koskâsii ääigi. Ärbivuáválâš valjâpeeivi jienâstmist sämikuávlu kieldâin tieđetteh maŋeláá. Postâjienâstmist jyehi jienâstemtohálii sämmilâžân vuolgâttuvvoo kirjettum reivâ, mast lii stemppâlistum jienâstemlippu. Ko tun macâttah reeivâ poostân tâi Sämitige valjâlävdikode toimâttâhân jienâstemääigi siste, te tuu jienâ rekinistoo mieldi valjáid.
Valjâlävdikodde aalgât jienâirekinistem valjâtoimâttâs maŋa vuossaargâ 2.10.2023 tijme 18 Sajosist Anarist.
Maht mun uusâm valjâluvâttâlmân?
Sämitige valjâluvâttâlmân kalga uuccâđ ain ive loopâst ovdil valjâive. Ive 2023 valjâluvâttâlmân kalga uuccâđ 31.12.2022 ovdil tme 16. Uuccâmääigist lii almottum il. Sämitige nettisiijđoin já loostâin.
Uuccâmluámáttâh lii finnimnáál šleđgâlâš já printtimnáál häämist. Šleđgâlii uuccâmluámáttuv tun kaavnah tääbbin, uuccâmluámáttuv printtim várás tun kaavnah tääbbin. Mušte lahteđ puoh taarbâšlijd lahtosijd ucâmušân, tast ko tot iššeed ucâmuš kieđâvušmist. Iše uuccâmluámáttuv tevdimân puáhtá koijâdiđ puhelin peht Sämitige valjâlävdikode toimâttuvâst 010-839 3155 tâi šleđgâpoostâ peht vaalit(at)samediggi.fi.
Valjâluvâttâlmist puáhtá meiddei vyelgiđ meddâl. Almottâs kalga toohâđ kirjálávt já toimâttiđ valjâlävdikode toimâttâhân majemustáá vaaljâid ovdedeijee ive majemuš peeivi ovdil tme 16.
Luuvâ lase: SÄMITIGGEVAALJAH 2023
Toimâpaje 2020-2023 jesâneh já värijesâneh
