Säminuorah tuáivuh oovtâst orroom já sämikielâlii tooimâ – De2-haavâ koijâdâllâm vievâst kärttejuvvojii nuorâi tuoivuuh astoäigitooimâst
De2!-haavâst kärttejuvvojii nuorâi tuoivuuh sämikielâlii astoäigitooimâ háárán. Koijâdâllâm vuáđuld nuorah tuáivuh enâmustáá sämikielâlijd nuorâiehidijd já oovtâst orroom eres säminuorâiguin. Säminuorâid kiäsutteh koijâdâllâm vuáđuld lihâdem, ärbivuáváliih tááiđuh já olgonlihâdem. Iänááš uási koijâdâlmân västidâm nuorâin tuáivuh, ete toimâ uárnejuuččij sii jieijâs päikkikylást.
– Koijâdâllâm vuáđuld nuorah tuáivuh oovtâst orroom eres säminuorâiguin sehe saje, kost puáhtá tuš peri orroođ. Haavâ koijâdâlmân pottii 97 vástádâssâd já mij lep uáli tuđâvááh vástádâsâi miärán. Mij viggâp haavâst västidiđ nuorâi tuoivuid, nuuvt ete nuorâin ličij älkkee uásálistiđ tooimân, muštâl haavâ proojeektpargee Anni Saara Aikio.
De!2-haahâ lii čoovčâ ääigi vuálgám ucceeb kyláid já toimâ lii uárnejum taan räi Vuáčust, Käresavonist já Čevetjäävrist.
-Roovvâd-skammâmáánu ääigi toimâ uárnejuvvoo vijđáht pirrâ sämikuávlu. Puátimin lii eereeb iärrás tulâstâllâm, spellâmehideh já olgonlihâdem. Oovtâstpargoost Jottee Tyeji -havváin uárnejuvvoo Avelist riessâmkurssâ. Toos lasseen vuávámnáál lii mokkemätki Kárášjuuvâ já Kuovdâkiäinu tyejimarkkânáid, muštâl Aikio.
Nuorâirääđi almostit haavâ toorjân jieijâs nettisiijđoin nuorâipargo-siijđoid. Siijđoin oovdânpuáhtojeh nuorâirääđi toimâvyevih, moiguin tot viggá nanodiđ sämikielâlii nuorâitooimâ. Siijđoin lii ei. idealoová, moos nuorah pyehtih pieijâđ ideaid, tuoivuid já iävtuttâsâid tooimâst. Lasseen siijđoin lii tábáhtusah-uási, moos norrojeh nuorâirääđi já haavâ puáttee tooimah.
Sämitige valjâpaje toimâohjelmân nuoráid kyeskee mittomeerijd lii pajedum sämikielâlii já -kulttuur miäldásii nuorâi astoäigitooimâ nanodem. Sämitige nuorâirääđi lii finnim nuorâipargo ovdedemhaahân 46 500 € ruttâdem Laapi Kuávluhaldâttâhvirgáduvâst. Haahâ olášuttoo 1.1.2024–31.12.2025 koskâsii ääigi oovtâstpargoost Sämikuávlu kieldâiguin, Säämi máttááttâskuávdáin já nuorâikuávdáš Vasatokkain.
Haavâ tooimâ puáhtá čuávvuđ sosiaallii mediast haavâ Instagram-siijđoin @de_astoaiggedoaibma.
Lasetiäđuh:
Anni Saara Aikio Elli-Marja Hetta
De! 2-haavâ proojeektpargee Nuorâičällee
anni-saara.aikio(at)samediggi.fi elli-marja.hetta(at)samediggi.fi
puh. 044 9013500 puh. 050 3825179
Uáppáásm meid
Nuorâirääđi saavâjođetteijen Rosa-Máren Juuso já värisaavâjođetteijen Niila-Juhán Valkeapää
Nuorâirääđi saavâjođetteijen juátká Rosa-Máren Juuso já värisaavâjođetteijen väljejui Niila-Juhán Valkeapää.Nuorâirääđi äššitobden väljejuvvojii Leo Vilmunen, Nuppu-Maaria Näkkäläjärvi, Nils-Matti Juuso, Niiles Harlin ja Heta Sieppi.
Sämitige nuorâirääđi ocá äššitobdeejesânijd!
Lah-uv 15-17 ihásâš säminuorâ? Halijdah-uv peessâđ vaiguttiđ säminuorâi aššijd já uápásmuđ já viärmádâttâđ eres säminuoráid? Mij uuccâp nuorâirääđi äššitobden aktiivlijd sämiaašijn perustum nuorâid pirrâ Suomâ.
Nuorâi sahâvuáru Sämitige ornijdemčuákkimist já nuorâirääđi nomâttem
Ornijdemčuákkimist nuorâi sahâvuáru tooláin nuorâirääđi valjim ovdâsteijeeh Rosa-Máren Juuso Iänuduvâst já Mihku Näkkäläjärvi Anarist.
De! 2-haavâ toimâ vuálgá joton
Sämitige já sämikuávlu kieldâi ohtsâš De! 2 -haavâ lii algâttâm tooimâs.
Sämitigge ocá meriáigásii proojeektpargee nuorâirääđi De!2 -haahân
Proojeektpargee pargon lii sämikielâlii- já kulttuurmiäldásii nuorâipargo ovdedem sämikuávlu kieldâin hahâvuávám mield oovtâst Sämitige nuorâiraađijn já haavâ stivrimjuávhoin.
Nuorâirääđi uásálistij OA algâaalmugij pisováá foorumân
Sämitige nuorâirääđi saavâjođetteijee Rosa-Máren Juuso já värisaavâjođetteijee Helmi Ljetoff uásálistijn OA algâaalmugij pisováá foorumân (UNPFII) New Yorkist. Foorum 23. čuákkim teeman lii algâaalmugij jiešmeridemvuoigâdvuođâ nanodem OA algâaalmugij vuoigâdvuođáid kyeskee julgáštus ohtâvuođâst: algâaalmugij nuorâi jienâ tiäduttem.
Nuorâirääđi saavâjođetteijeeh väljejum
Sämitige nuorâirääđi saavâjođetteijen väljejui Rosa-Máren Juuso Käresavonist já värisaavâjođetteijen Helmi Ljetoff Helsigist.
Nuorâirääđi toimâpajan 2024-2025 lii asâttum
Sämitige čuákkim asâttij nuorâirääđi toimâpajan 2024-2025 čuákkimistis 30.1.2024.