Nuorâirääđi uásálistij OA algâaalmugij pisováá foorumân
Sämitige nuorâirääđi saavâjođetteijee Rosa-Máren Juuso já värisaavâjođetteijee Helmi Ljetoff uásálistijn OA algâaalmugij pisováá foorumân (UNPFII) New Yorkist. Foorum 23. čuákkim teeman lii algâaalmugij jiešmeridemvuoigâdvuođâ nanodem OA algâaalmugij vuoigâdvuođáid kyeskee julgáštus ohtâvuođâst: algâaalmugij nuorâi jienâ tiäduttem.
Nuorâirääđi toolâi 16.4. sahâvuáru, mast saavâjođetteijee Rosa-Máren Juuso pajedij oovdân tuđâmettumvuođâ sämitiggevaaljâi uđđâsist orniimân já AHR miärádâsân tast, ete ovdebij vaaljâi maŋa 18 ihheed tiävdám säminuorâin ij lah máhđulâšvuotâ ucâluđ valjâluvâttâlmân.
– Toos lasseen, ete mist lii tobdo, ete mij lep olgoštum já paijeelkeččum, te mij poollâp Sämitige puátteevuođâ peeleest. Muu mielâst lii polâttettee smiettâđ, ete maid mij kolgâp killáđ ulguupiälálij peelij miärádâsâin mii kielâ já kulttuur siäilum tááhust, paahud nuorâirääđi saavâjođetteijee Rosa-Máren Juuso.
– Ko foorum teeman lii jiešmeridemvuoigâdvuođâ nanodem já eromâšávt nuorâi jienâ pajedem savâstâlmân, te lii sorolâš, ete Suomâst taheh miärádâsâid tai teemai vuástá. Vaaljâin, moh uárnejuvvojeh uđđâsist, säminuorah, kiäh láá eidu tiävdám 18 ihheed, iä peesâ jienâstiđ. Taat keeppid nuorâi osko demokraatlii systeemân, epke mij tieđe, ete magareh vaikuttâsah tast láá ovdâmerkkân jienâstemaktiivlâšvuotân. Toos lasseen nuorah láá vaibâm kuhháá jotkum taistâlmist Suomâ lahâaasâtmáin. Sämitiggelaavâ uđâsmittem lii tiäđust-uv olmoošvuoigâdvuotâäšši, mutâ siämmást tot tiptáččij mii vuáijuđ nuorâi aššijd já pyereestvajemân, iätá nuorâirääđi värisaavâjođetteijee Helmi Ljetoff.
OA pisováá foorum pargon lii pajediđ savâstâlmân algâaalmugáid kyeskee koččâmušâid eromâšávt ekonomâlii já sosiaallii ovdánem, kulttuur, pirâskoččâmušâi, škovlim, tiervâsvuođâ já olmoošvuoigâdvuođâi syergist. Pisovâš foorum addel avžuuttâsâid sehe tuáimá tehálâš foorumin staatâi, algâaalmugij já OA sierânâsseervij koskâsii vuárusavâstâlmân. Tot čokkân ohtii ivveest OA váldusaajeest New Yorkist.
Pisováá foorum čuákkimáid uásálistem lii uási nuorâirääđi toimâvuáváámân čallum tooimâst.
Luuvâ lase foorumist.
Luuvâ lase nuorâirääđi aalmugijkoskâsii tooimâst.
Lasetiäđuh:
Rosa-Máren Juuso
nuorâirääđi saavâjođetteijee
puh. 044 779 9420
rosa-maren.juuso(at)samediggi.fi
Helmi Ljetoff
nuorâirääđi värisaavâjođetteijee
helmi.ljetoff(at)samediggi.fi
Uáppáásm meid
Nuorâirääđi saavâjođetteijen Rosa-Máren Juuso já värisaavâjođetteijen Niila-Juhán Valkeapää
Nuorâirääđi saavâjođetteijen juátká Rosa-Máren Juuso já värisaavâjođetteijen väljejui Niila-Juhán Valkeapää.Nuorâirääđi äššitobden väljejuvvojii Leo Vilmunen, Nuppu-Maaria Näkkäläjärvi, Nils-Matti Juuso, Niiles Harlin ja Heta Sieppi.
Säminuorah tuáivuh oovtâst orroom já sämikielâlii tooimâ – De2-haavâ koijâdâllâm vievâst kärttejuvvojii nuorâi tuoivuuh astoäigitooimâst
De2!-haavâst kärttejuvvojii nuorâi tuoivuuh sämikielâlii astoäigitooimâ háárán. Koijâdâllâm vuáđuld nuorah tuáivuh enâmustáá sämikielâlijd nuorâiehidijd já oovtâst orroom eres säminuorâiguin. Säminuorâid kiäsutteh koijâdâllâm vuáđuld lihâdem, ärbivuáváliih tááiđuh já olgonlihâdem. Iänááš uási koijâdâlmân västidâm nuorâin tuáivuh, ete toimâ uárnejuuččij sii jieijâs päikkikylást.
Sämitige nuorâirääđi ocá äššitobdeejesânijd!
Lah-uv 15-17 ihásâš säminuorâ? Halijdah-uv peessâđ vaiguttiđ säminuorâi aššijd já uápásmuđ já viärmádâttâđ eres säminuoráid? Mij uuccâp nuorâirääđi äššitobden aktiivlijd sämiaašijn perustum nuorâid pirrâ Suomâ.
Nuorâi sahâvuáru Sämitige ornijdemčuákkimist já nuorâirääđi nomâttem
Ornijdemčuákkimist nuorâi sahâvuáru tooláin nuorâirääđi valjim ovdâsteijeeh Rosa-Máren Juuso Iänuduvâst já Mihku Näkkäläjärvi Anarist.
De! 2-haavâ toimâ vuálgá joton
Sämitige já sämikuávlu kieldâi ohtsâš De! 2 -haavâ lii algâttâm tooimâs.
Sämitigge ocá meriáigásii proojeektpargee nuorâirääđi De!2 -haahân
Proojeektpargee pargon lii sämikielâlii- já kulttuurmiäldásii nuorâipargo ovdedem sämikuávlu kieldâin hahâvuávám mield oovtâst Sämitige nuorâiraađijn já haavâ stivrimjuávhoin.
Nuorâirääđi saavâjođetteijeeh väljejum
Sämitige nuorâirääđi saavâjođetteijen väljejui Rosa-Máren Juuso Käresavonist já värisaavâjođetteijen Helmi Ljetoff Helsigist.
Nuorâirääđi toimâpajan 2024-2025 lii asâttum
Sämitige čuákkim asâttij nuorâirääđi toimâpajan 2024-2025 čuákkimistis 30.1.2024.