Nuorâirääđi ohtân váldu-ulmen lii ovdediđ sämikielâlii já -kulttuur miäldásii nuorâi- já rijjâääigi tooimâ. Ulmen lii nanodiđ säminuorâi identitet, uásálâšvuođâ já oovtâviärdásâšvuođâ sehe ovdediđ täsiáárvu. Taan siijđost mij oovdânpyehtip nuorâirääđi toimâmvuovijd, moiguin tot naanood sämikielâlii nuorâitooimâ. Kuovlâl siämmást tábáhtumekalenderân / puáttee tábáhtuumijd!
-
Joođoost leijee haahâ: De!2
De! 2-sämikielâlii nuorâipargo ovdedem sämikuávlu kieldâin -haahâ oovded sämikielâlii já -kulttuur miäldásii nuorâipargo já rijjâääigi tooimâ sämikuávlu kieldâin 13–29-ihásijd säminuoráid. Toimâ vuáđuduvá sii tuoivuid já tárboid, moh kärttejuvvojeh haavâ ääigi.
Oovtâstpargokyeimin haavâst láá sämikuávlu kieldah, Sämikuávlu máttááttâskuávdáš já Nuorâikuávdáš Vasatokka, já haavâ proojeektpargen lii Anni-Saara Aikio. Haavâ ruttâd Laapi kuávluhaldâttâhvirgádâh, já haahâ olášuttoo äigipaajeest 1.1.2024–31.12.2025.
Tábáhtumeh
Nuorâilaahâ
Nuorâilaavâ vuolgâsaijeen lii iärrás lasseen maaŋgâhámásâšvuotâ já aalmugijkoskâsâšvuotâ.
Nuorâilaavâ 21.12.2016/1285 2 § mield laavâ ulmen lii:
- Ovdediđ nuorâi uásálâšvuođâ já vaiguttemmáhđulâšvuođâid sehe aapijd já máhđulâšvuođâid toimâđ ohtsâškoddeest;
- Tuárjuđ nuorâi šoddâm, jiečânâssân oppâm, siärváduvlâšvuođâ sehe tooid lohtâseijee tiäđui já tááiđui oppâm;
- Tuárjuđ nuorâi puđâldâsâid já tooimâ aalmugjeessânohtsâškoddeest;
- Ovdediđ nuorâi oovtâviärdásâšvuođâ já täsiáárvu sehe vuoigâdvuođâi olášume; sehe
- Pyerediđ nuorâi šoddâm- já eellimtiilijd.
Ulme olášuumeest vuolgâsaijeen láá:
1) ohtsâš ovdâsvástádâs, kulttuurij maaŋgâhámásâšvuotâ já aalmugijkoskâsâšvuotâ;
2) kilelis ovdánem, tiervâsliih eellimvyevih sehe pirrâs já eellim kunnijâttem;
3) maaŋgâsuárgág oovtâstpargo.
Käldee: Finlex. Nuorisolaki 1285/2016 – Ajantasainen lainsäädäntö – FINLEX ®
Säämi kielâlaahâ
Nuorâilaavâ lasseen meid säämi kielâlaahâ kuáská nuorâipaargon. Säämi kielâlaavâ ulmen lii turviđ sämmilij vuáđudemlaavâst siäđudum vuoigâdvuođâ paijeentoollâđ já ovdediđ jieijâs kielâ já kulttuur. Nuorâipargo kulá kieldâi lahâaasâtlijd palvâlussáid, já kielâlaahâ kenigit virgeomâháid sämikielâlij palvâlusâi täähidmist. Nuuvtpa sämikielâlâš nuorâipargo kulá säämi kielâlaavâ miäldásávt kieldâi (Aanaar, Ucjuuhâ, Iänudâh já Suáđigil) laavâst asâttum palvâlussáid.
Käldee: Finlex. Saamen kielilaki 1086/2003 – Ajantasainen lainsäädäntö – FINLEX ®