Sámedikki 21 lahtu ja njeallje várrelahtu válljejuvvojit sápmelaččaid siste válggain, mat doaimmahuvvojit juohke njealját jagi. Sámiid ruovttuguovllu guđege gielddas galget válljejuvvot unnimustá golbma ovddasteaddji sámediggái. Válggain jienastit dat sápmelaččat, geat leat merkejuvvon válgalogahallamii. Jienastanvuoigatvuohta addá maiddái vuoigatvuođa leat evttohassan. Sámedikki válggat doaimmahuvvojit 4.9.-2.10.2023.
Sámedikki válggat doaimmahuvvojit 4.9.-2.10.2023.
Válgaáššebáhpárat doaimmahuvvojit jietnavuoigadahtton olbmuide čakčamánu álggus poastta fárus čálihuvvon breavan.
Mot beasan jienastit?
Juos leat ohcalan válgalogahallamii ja ožžon jienastanvuoigatvuođa, vuordde čuovvovaš válggaid ja jienas! Válgajagis buot válgalogahallamii merkejuvvon sápmelaččat ožžot poastta mielde almmuhusa jienastanvuoigatvuođasteaset.
Juos ovddit válggaid áigge ledjet vel vuolleahkásaš, muhto dál livččet jienastangelbbolaš, berret ohcalit čuovvovaš válggain válgalogahallamii.
Sámedikki válgalávdegoddi lea sádden mannan válggaid maŋŋá ovdal čuovvovaš válggaid loahpa dievas ahkásažžan ollen nuoraide muittuhanreivve válgalogahallamii ohcama birra. Don galggat liikká ieš leahkit aktiivvalaš ja ohcat!
Jagi 2023 válggat doaimmahuvvojit poastajienastemiin 4.-2.10.2023 gaskasaš áigge. Válgabeaivve jienasteami birra dieđihuvvo maŋŋelabbos. Poastajienasteamis juohke válggas válgagelbbolaš sápmelažžii sáddejuvvo girjejuvvon reive, mas lea steampalaston jienastanlihppo. Go máhcahat reivve postii dahje sámedikki válgalávdegotti doaimmahagaide jienastanáigge siste, du jietna rehkenastojuvvo mielde válggain.
Válgalávdegoddi álggaha jienaidrehkenastima válgadoaimmahusa maŋŋá vuossárgga 2.10.2023 dmu. 18 Sajosis Anáris.
Loga eambbo: Sámediggeválggat 2023
Mot ohcalan válgalogahallamii?
Sámedikki válgalogahallamii ohcaluvvo alo dan jagi loahpa rádjái, mii lea ovdal válgajagi. Jagi 2023 sámediggeválggaid válgalogahallamii sáhttá ohcat 31.12.2022 ovdal diibmu 16. Ohcanáiggi birra lea almmuhuvvon ee. sámedikki neahttasiidduin ja áviissain.
Ohcanskovvi lea fidnemis sihke elektrovnnalaš hámis ja čálihanhámis. Elektrovnnalaš ohcanskovi fidnet dáppe, ohcanskovvi čáliheami várás fas gávdno dáppe. Muitte laktit buot dárbbašlaš mildosiid iežat ohcamuššii, vai ohcamuša lea álkit gieđahallat. Jus lea dárbu, fidnet veahki ohcanskovi deavdimii juogo válgalávdegotti doaimmahagas nummáris 010-839 3155 dahje čujuhusas vaalit(at)samediggi.fi
Válgalogahallamis sáhttá vuolgit maiddái eret. Almmuhusa galgá dahkat čálalaččat ja doaimmahit válgalávdegotti doaimmahahkii maŋemustá válggaid ovddit jagi maŋemuš beaivve ovdal diibmu 16.
