Konferánssat

Sámedikki Nuoraidráđđi lágida váldoáššis guovtti jagi gaskkaid sámenuoraid konferánssa. Sámenuoraid konferánsa sáhttá addit iežas namainis almmolaš cealkámušaid, evttohusaid ja álgagiid, mat laktásit sámenuoraid eallindillái ja buresbirgejupmái. Sámedikki nuoraidráđđi lea oassi Sámi Parlamentáralaš Ráđi nuoraidráđis. Parlamentáralaš ráđi vuollásaš nuoraidráđđi viggá maiddái lágidit guovtti jagi gaskkaid davviriikkalaš sámenuoraid konferánssa.

Oktasaš davviriikkalaš sámenuoraid konferánsa 2020

Sámi parlamentáralaš ráđi vuollásaš nuoraidráđđi lágida guovtti jagi gaskkaid Davviriikkalaš sámenuoraid konferánssa. Konferánsa lágiduvvo ovttasbarggus Norgga, Ruoŧa ja Suoma Sámedikkiid nuoraiddoibmiiguin. Konferánssa temá lea dálkkádatrievdan.

Konferánssa galge lágidit Anáris 13-14.8.2020, muhto dan mearridedje maŋidit koronaviruspandemiija dihte. Váldoovddasvástádus konferánssa lágideamis lea Suoma Sámedikki nuoraidráđis.

Sámedikki dieđáhus:

Sámeparlamentarihkkáriid konferánsa 2020 sirdašuvvá 

Maiddái sámenuoraid konferánssa galge lágidit borgemánus parlamentarihkkáriid konferánssa olis. Oktasaš davviriikkalaš nuoraid konferánsa lágiduvvo guovtti jagi gaskkaid ja boahttevaš temán lea mearriduvvon dálkkádatrievdan-

– Dađi bahábut dán dilis eai leat eará molssaeavttut. Eat sáhte goittotge diktit dili heajudit sámenuoraid váikkuhanvejolašvuođaid rájiid rastá, nappo SPR nuoraidráđđi čielggada dál vejolašvuođaid lágidit sámenuoraid konferánssa dahje oasi das gáiddusin, gávnnaha nuoraidráđi sátnejođiheaddji Anni-Sofia Niittyvuopio.


Troanddin, Norga 8.2.2017

Jagis 2017 nuoraidráđđi ii lágidan iežas sierra konferánssa, muhto baicca dat lágidii ovttas Norgga Sámedikki nuorrapolitihkalaš lávdegottiin ja Ruoŧa Sámedikkiin sámenuoraid konferánssa Troanddimis 8.2.2017.  Konferánssa fáddán lei váikkuheapmi ja dasa biddjojuvvui namman ”dolla” buot guhtta sámegillii. Sámenuoraid konferánssa ulbmilin lei doarjut sámenuoraid politihkalaš beroštumi ja oasálašvuođa sápmelaččaid servodaga ovddideamis ja doarjut sámenuoraid oktavuođaid, searvvušvuođa ja rájiid rasttildeaddji ovttasbarggu. Bargobájiid ja almmolaš cealkámuš -bargguid bokte nuorat besse buktit iežaset jiena gullosii. Konferánssa áigge lágiduvvojedje čuovvovaš bargobájit: juoigan, graffiti, rap, SOME-váikkuheapmi, Flash Mob ja oktasaš Sápmi riekteperspektiivvas. Nuoraid konferánsa dohkkehii iežas almmolaš julggaštusa.

 

Helsset, Eduskunnan Pikkuparlamentti 17.11.2015

Konferánssas ságastallojuvvui das, manin sámenuorat fárrejit eret ruovttuguovllus ja báhcet orrut gávpotguovlluide. Hupmame ledje sámenuorat ja áššedovdit máŋgga suorggis ja iešguđet ministeriijain. Panelaságastallamii fáttá birra oassálaste mánáidáittardeaddji Tuomas Kurttila, Sámedikki ságadoalli Tiina Sanila-Aikio, servodatdiehtagiid studeanta Aslak Uula Länsman, giellabargi Neeta Jääskö ja riikkabeaiáirras Markus Lohi (guovddáš). Panela láidestedje Suoma ON-nuoraiddelegáhtta Mikkel Näkkäläjärvi ja Suoma sámenuoraid ságadoalli Ida-Maria Helander.

Konferánssa oktavuođas lágiduvvojedje eahketdoalut On the Rocks restoráŋŋas, gos loaiddasteigga sámerap-artisttat Ailu Valle ja Amoc.

 

Kuva: Vesa Toppari, Yle Sápmi


Anár, Sámekulturguovddáš Sajos 6.-7.2.2014

Konferánsa lágiduvvui Anáris, Sámekulturguovddáš Sajosis. Konferánssa fáddán lei utnolašvuohta ja sámenuoraid identitehta. Prográmmii gulai maiddái álbmotbeaivvi eahketkonsearta.

Utnolašvuohta gieđahallojuvvui konferánssa vuosttaš beaivve. Dilálašvuođas ledje hupmame várreságadoalli Eero Vainio ja Ii vaššiságaide -lihkadus (Ei vihapuheelle) aktivisttat Veeti Nevala ja Seida Sohrabi. Dasa lassin utnolašvuohta gieđahallojuvvui dráma bokte.

Konferánssa nuppi beaivvi fáddán lei sámenuoraid identitehta, mii gieđahallojuvvui panelaságastallamis. Panelistan ledje sámekultuvrra leanadáiddár Tanja Sanila, Suoma studeantagottiid lihtu SAMOK várreságadoalli Mikkel Näkkäläjärvi, anárašgiela studeanta Martta Alajärvi ja studeanta Aslak-Uula Länsman.

 


Helsset, Riikabeivviid pikkuparlamentti 10.10.2012

Sámedikki nuoraidráđđi ja Suoma sámenuorat rs lágidedje Helssegis seminára sámenuoraid dálá dilis ja boahttevuođas Suomas. Semináras sámenuorat ovdanbukte sidjiide áigeguovdilis ja dehálaš áššiid. Árbevirolaš ealáhusaid dálá dilli, eatnigiela mearkkašupmi, sámi oahppaplána dehálašvuohta ja olgosápmelašvuohta ledje guovddáš áššit, maid nuorat ovdanbukte ságaineaset. Sámenuoraid oainnuid lassin seminárii ledje bovdejuvvon dáláš riikkabeivviid buot bellodagaid ovddasteaddjit panelaságastallamii, mas bellodagat besse vástidit bellodagaset linjá mielde sámiide ja earenoamážit sámenuoraide guoski jearaldagaide.

Seminára bokte Sámedikki nuoraidráđđi háliidii hásttuhit ja arvvosmahttit iešguđet oassebeliid bargat sámegielaid ja -kultuvrra nannema ovdii. Seammás fállojuvvui vejolašvuohta ságastallat boahttevuođa hástalusain ja ovddidanvejolašvuođain. Sámedikki nuoraidráđđi háliida dorvvastit sámegielaid ja -kultuvrra boahttevuođa sihke sámiid ruovttuguovllus ja dan olggobealde. Dáhpáhus lei oaivvilduvvon earenoamážit mearrideddjiide sihke organisašuvnnaid ja universitehtaid ovddasteddjiide.

Sápmi Show Narinkkatoris

Seminára maŋŋá  dollojuvvui Sápmi Show -gáhttadáhpáhus Helssega Narinkkatoris. Gáhttadáhpáhusa bokte háliidedje nannet sámekultuvrra, muitalit oaivegávpoga ássiide sámiid dilis Suomas ja gávdnat oaivegávpotguovllu nuoraid. Nuoraidráđđi ja SSN juhke info-lávus brošyraid gávpotsápmelašvuođas, nuoraidráđis, SSN:s ja Sámedikkis.

Dáhpáhus lei oaivvilduvvon buohkaide, geat fal ledje das beroštuvvan. Loaiddastanlávddis ledje golbma gáktečájáhusa ja guokte juoiganovdanbuktima. Dáhpáhusas loaiddastii maid rap-artista Ailu Valle ovttas Amociin, guhte ráppe anárašgillii. Čájáhusaid gaskkas čájehuvvojedje sámi oanehisfilmmat.

Davviriikkalaš nuoraid konferánsa, Suoločielgi 13-15.10.2011

Davviriikkalaš nuoraid konferánsa lei vuosttaš konferánsa, man nuoraidráđđi lágidii vuosttaš doaibmajagis áigge. Konferánsa leai muhtin oassái giddejuvvon, muhto váldoáššis rabas buohkaide. Temán konferánssas ledje árbediehtu, turisma, gákti ja dan ođasmahttin ja sámevuođa seailluheapmi sámeguovlluid olggobealde. Konferánsii oassálaste Suomas, Norggas ja Ruoŧas oktiibuot sullii 70 olbmo. Konferánssa oktavuođas lei Norgga, Suoma ja Ruoŧa sámedikkiid nuoraid orgánaid vuosttaš oktasaš čoahkkin. Čoahkkimis álggahuvvui almmolaš cealkámuša válmmaštallan, mii de dolvojuvvui SPR konferánsii, ja seammás álggahuvvui Nuoraid seminára válmmaštallan ja plánen, mii dollojuvvo SPR konferánssa oktavuođas.

Bohciidedjego jearaldagat?

Livččetgo beroštuvvan ovttasbarggus nuoraidráđiin? Livččetgo beroštuvvan searvat mielde doaimmaide?

Ota yhteyttä