Nuorâirääđi toimâpaje lii kyehti ive.
Nuorâirääđi nomâtteh Sämitige čuákkimist nuorâirääđi iävtuttâs vuáđuld, mutâ saavâjođetteijee já värisaavâjođetteijee nuorâirääđi noomât jieš toimâpaje aalgâst.
Nuorâirááđán väljejeh saavâjođetteijee, värisaavâjođetteijee já vittâ eres jeessân sehe juáhážân persovnlâš värijesâneh.
Nuorâirááđán väljejeh kyevti ihán häävild enâmustáá vittâ pissoo äššitobdee, kiäh kalgeh leđe valjiidijn 15-17-ihásiih.
Nuorâirääđi nomâttâm nuorâirääđi eidusâš jesânist lii sárnumvuoigâdvuotâ sämitige čuákkimist sehe mieldiorroom- já sárnumvuoigâdvuotâ sämitige stiivrâ čuákkimist nuorâirääđi valmâštâllâm aašijn.
Nuorâirääđi pargoid kulá jiešráđálávt tuáimee sierâ Säminuorâi konferens ornim kyevti ive kooskâi teikkâ eromâš suujâst täävjib. Säminuorâi konferens puáhtá adeliđ jieijâs noomáin almosciälkkámušâid, iävtuttâsâid já aalgâid, moh lahtâseh säminuorâi eellimtiilijd já pyereestvajemân.