Säminuorâi konferens uárnejuvvoo Anarist 14.-15.8.2025

Konferensist kuullâp sahâvuáruid Sämitige saavâjođetteijee sajasâš Tuomas Aslak Juusost, Nuorâirääđi värisaavâjođetteijee Niila-Juhán Valkeapääst, muusikpedagog já jyeigee Laura Tapiolast sehe videotiervâttâs lihâdem-, valastâllâm- já nuorâičällee Mika Poutalast. Ohjelmist láá sahâvuárui lasseen uásálistittee pargopáájáh.

– Mij lep nuurrâm ohjelmân sahâvuárui lasseen kiäsutteijee pargopáájáid já lep pargopáájái uásild porgâm oovtâstpargo sierâlágán havâiguin tego CAP-SHARE, SápmiDem, Syke: IKForest já Rievdan -havâiguin sehe Sámi Duodjijn já Sämimuseo Siidain, muštâl konferens orniistâlmijn västideijee Lifu Torikka.

 

– Säminuorâi konferens ij lah uárnejum maaŋgâ ive, já veikâ mii mittomeeri konferens uásálisteemeereest ij olášum, te mun oskom, ete konferenspeeivih láá kiäsutteijeeh já mij pyehtip siämmást savâstâllâđ säminuorâi tuoivuin já táárbuin nuoráid ornimnáál tooimâ háárán, iätá konferens valmâštâllee pargojuávhu saavâjođetteijee Niila-Juhán Valkeapää.

 

– Mij tuáivup, ete säminuorâi čokkânmijn šodâččii merikoskâsiih tábáhtusah, kuus nuorah pastaččii älkkeht almottâttâđ jieijâs nuuvt, ete ij taarbâš perustiđ ovdâmerkkân tábáhtusâi ruttâdmist. Taan ääigi iänááš uási säminuorâin ääsih piäđgui já nuorah viettih harvii huolâttes astoääigi nubijdiskuin. Čokkânmij mield nuorah puávtáččii viärmádâttâđ já návt finnejeh uđđâ ustevijd já uápisulmuid, já täst sáttá leđe ävkki puátteevuođâst, ovdâmerkkân pargoelimist, ettâv Valkepäää já Torikka.

Konferensist ráhtoo almosciälkkámuš ärbivuáválii tiäđu merhâšuumeest säminuoráid já tot adeluvvoo tábáhtus loopâst Sämitige ovdâsteijei. Ärbivuáválâš tiätu lii algâaalmugij uáinust merhâšittee siärváduv vyeimivääri, mii naanood sehe kulttuurlii jotkuuvâšvuođâ já siärváduv cevzimnaavcâ muttojeijee maailmist. Tot ij lah tuš moonnâmääigi mušto, peic ellee, anolâš já siärvuslâš uási aargâst já identiteetist. Eromâšávt säminuorâi rooli jieijâs kulttuur ärbivuáválii tiäđu sirdemist já haaldun väldimist lii tehálâš, tastko eidu sij juátkih kulttuurlijd taavijd já heiviitteh taid taan ääigi hástusáid.

Konferens váldu-uárnejeijen tuáimá Sämitige nuorâirääđi. Nuorâirääđi västid nuorâirääđi ooleest jiečânávt tuáimee sierâ säminuorâi konferens orniimist kyevti ive kooskâi tâi eromâš suujâ tiet tađe täävjib. Säminuorâi konferens puáhtá adeliđ jieijâs noomáin almosciälkkámušâid, iävtuttâsâid já alguid, moh lohtâseh säminuorâi eellimtilán já pyereestvajemân.   Konferens lii nuuvtá já ávus puoh säminuoráid.

Lasetiäđuh:

Nuorâirääđi proojeektpargee

Lifu Torikka

Puh. 044 902 4833

lifu.torikka@samediggi.fi

Nuorâirääđi konferens pargojuávhu saavâjođetteijee

nuorâirääđi värisaavâjođetteijee

Niila-Juhán Valkeapää

niila-juhan.valkeapaa@samediggi.fi

Nuorâičällee

Elli-Marja Hetta

puh. 050 382 5179

elli-marja.hetta@samediggi.fi

Nuorâirääđi njunošpargoh láá ovdediđ säminuorâi kielâlijd já kulttuurlijd vuoigâdvuođâid sehe nanodiđ säminuorâi kulluuvâšvuođâ sämikulttuurân. Nuorâirääđi valmâštâl meid taid Sämitige ciälkkámušâid, alguid já eres uáivilijd moh kyeskih säminuoráid tai säminuorâi eellimtiilijd.