Jis nuuská pyeredičij čođâldittemnaavcâ, te tot luhhuuččij doping-amnâsin. Nikotin paskood vorrâsuonâid, mast čuávu, et teekij vorrâjotteem kiäppán já happi já ravâdâsamnâseh iä jođe tiäkán nuuvt pehtilávt. Ton čuávumâššân meid tekkivyeimi já tekkimassa kiäppáneh, lihâdemvoovij vaarâ stuáru já tuoibâm hiđásmuvá.

Nuuská haaldust toollâm já enâmânpyehtim lii laavâ mield kieldum vuálá 18-ihásijn.

Nuuská já tubbáák viärdádâllâm ij lah jiärmálâš, tondiet ko kuábbást-uv láá tuođâliih hááituh. Lii tuotâ, et nuuská kevttee ij painâšuu suovân já ton keežild tot ij toovât vuoiŋâmuálipuácuvuođâid siämmáá náál ko tubbáák, mut nuuskást láá iäpádâsâittáá eres, váduhis tiervâsvuotâhemâdâsah.

Nuuská ana sistees 2500 amnâsid, main 28 tovâtteh puurrâs.

Puoh merhâšitteemus iäru lii tast, et nuuská ana sistees joba 20 kerd eenâb nikotin ko tubbáák. Tondiet tot toovât jotelávt vuáimálii sorjolâšvuođâ.

Valastellee ij kannat kevttiđ maiden tubbáákpyevtittâsâid, tondiet ko tain ij finnii magarijdgin hiäđuid, pic pyerebeht-uv toh hiäjusmiteh valastâllâmčođâldâs.

Nuuská kevttim toovât maaŋgâlágánijd hemâdâsâid. Tot vahâgit njäälmi kuávlu, eromâšávt panij käskimase já oolnâid. Nuuská lasseet riiskâ puáccáđ njälmi-, čudâ- já čuávjičulgâráksápurâsân. Tot meid loptee vááimu časkemliävtu, já nuuvtpa kevttim lasseet váimuvorrâtoppâm riiskâ. Tot myekkee meid sisâorgaanij, čuávji já vááimu toimâm, tondiet ko nuuská kevttee sáttá njielâstiđ tom vahâgist.