Sämitige nuorâirääđi já Ovdâskoddepiäláduvâi nuorâiseervih: Sämitiggelaavâ kalga uđâsmittiđ tääl

Sämitige nuorâirääđi, Demarinuorah, Kokoomusnuorah, Ruánáá nuorah, Čižetpelnuorah, RKP-nuorah, KD Nuorah já Liike Nyt Nuorah väätih sämitiggelaavâ uđâsmittem OA olmoošvuoigâdvuotâkomitea kenigittem miäldásávt.

Iävtuttâs uđđâ sämitiggelaavâst ovdán ovdâskode kieđâvušmân skammâmáánust. Ovdâskoddepiäláduvâi nuorâiseervih já Sämitige nuorâirääđi väätih, ete sämitiggelaahâ uđâsmittoo tääl, vâi Suomâ puáhtá tivvoođ OA olmoošvuoigâdvuotâkomitea ive 2019 pahudum olmoošvuoigâdvuotâluávkkim. Olmoošvuoigâdvuotâkomitea lii pahudâm, ete Suomâ lii luávkkám aalmuglâš- já poolitlij vuoigâdvuođâi sopâmuš. Toos lasseen Suomâ lii finnim eres avžuuttâsâid, moh kyeskih sämmilij vuoigâdvuođáid.

Olmoošvuoigâdvuotâkomitea lii váldám 1. cuáŋuimáánu 2021 sämmilij vuoigâdvuođáid kyeskee avžuuttâsâid huáputtum čuávumân. Komitea kiddij huámmášume eromâšávt toos, ete sämitiggelaavâ jienâvuoigâdvuotâmiäruštâllâm já ráđádâllâmkenigâsvuođâ iä lah nubásmittám vuovvijn, mii turviiččij sämmilij jiešmeridemvuoigâdvuođâ.

”Sämitiggelaavâ uđâsmitmân lii čielgâ kenigittem OA olmoošvuoigâdvuotâkomiteast. Lii tehálâš, ete kieskâd OA olmoošvuoigâdvuotârááđán väljejum Suomâ čonâdât turviđ olmoošvuoigâdvuođâi olášume meid jieijâs päikkienâmist. Sämitiggelaavâ uđâsmittem lehâččij viijmâg kiäinu sämmilij vuoigâdvuođâi oovdedmân maaŋgâin ohtsâškodálijn taasijn, tego soti-palvâlusâi, iäláttâsâi sehe sämikielâlii – já kielâ máttááttâs oovdedmist”, pahudeh ovdâskoddepiäláduvâi nuorâiseervih.

Ovdâskoddepiäláduvâi nuorâiseervih já Sämitige nuorâirääđi tiädutteh, ete laavâ uđâsmitmist lii stuorrâ merhâšume ovtâskâs ulmui, sämmilij olmoošvuoigâdvuođâi olášuumân, mutâ meid sämmilij luáttámušân syemmilii riehtivuáhádâhân já miärádâstohâmân.

”Taan tove laahâ ij västid tááláá ibárdâs algâaalmugij vuoigâdvuođâin. Te lii tuođâi äigi uđâsmittiđ laavâ, vâi sämmilij hináh jiešmeridemvuoigâdvuotân sehe kielâ já kulttuur paijeentolâmân já oovdedmân olášuveh”, paahud Sämitige nuorâirääđi saavâjođetteijee Anni-Sofia Niittyvuopio.

Laavâ nubásmittem valmâštâllâm toimâkodde iävtut maaŋgâid sämmilij vuoigâdvuođâid ovdedeijee nubástusâid laahân. Iävtuttâsâst eereeb iärrás älkkeeditáččii jienâstem, nanodiččii Sämitige toimâhinnáid já visásmitáččii puigâ vaiguttemmáhđulâšvuođâ toimáid, moh vaigutteh kielân já kulttuurân. Sämitiggelaavâ kalga te uđâsmittiđ tääl.

 

Anni-Sofia Niittyvuopio

Sämitige nuorâirääđi saavâjođetteijee

+358 40 7082 072

anni-sofia.niittyvuopio(at)samediggi.fi

 

Pinja Perholehto

Demarinuorâi saavâjođetteijee

+358 40 0596521

pinja.perholehto(at)demarinuoret.fi

 

Matias Pajula

Kokoomusnuorâi saavâjođetteijee

+358 505 753 347

matias.pajula(at)kokoomusnuoret.fi

 

Brigita Krasniqi já Peppi Seppälä

Ruánáá nuorâi saavâjođetteijeeh

+358 40 961 1330, +358 040 721 7912

puheenjohtajat(at)vihreatnuoret.fi

 

Liban Sheikh

Čižetpelnuorâi saavâjođetteijee

+358 50 5019 721

Liban(at)vasemmistonuoret.fi

 

Frida Sigfrids

RKP-nuorâi saavâjođetteijee

+358 40 5910 874

frida.sigfrids(at)su.fi

 

Annika Lyytikäinen

KD Nuorâi saavâjođetteijee

+358 50 3123 037

annika.lyytikainen(at)kdnuoret.fi

 

Joel Kettula

Liike Nyt Nuorâi saavâjođetteijee

+358 45 6337 843

joel.kettula(at)liikenyt.fi


Uáppáásm meid