Helmi Ljetoff

Leäm Meedd Kaurrâl Niilo Kauko Helmi, Helmi Ljetoff da leäm Čeʹvetjääuʹrest vuâlǥaž. Leäm jälstam Heʹllsnest muäʹdd eeʹjj, leša sõrgg jälstam âʹpet Sääʹmjânnmest. Mättʼtõõđam ǩeerjlažvuõđ Heʹllssen universiteeʹttest.

Leäm leämmaž nuõrisuåvtõõzzâst eeʹjjest 2020, aalǥâst äʹšštobddjen, mâŋŋa väärrvuäzzliʹžžen da ååʹn väärrsaaǥǥjååʹđteeʹjen. Aalǥâst muu rauʹǩǩeš ooʒʒõõttâd mieʹldd, leša loŋŋnem tåimmʼmõõžžâst tâʹlles altteen da täʹst veâl-i leäm.

Leäʹp nuõrisuåvtõõzzâst viikkâm čõõđ juʹn määŋgaid oʹnnstam projeeʹktid, jeäʹrben Dihtosis- projeeʹkt vuäinam vääžnʼjen da haaʹleʹčem vueiʹnned tõn põõššjen šõddâm pieʹǩǩen tåimmʼmõõžž.

Åäʹn vuäinam õhttân tääʹrǩmõš äʹššen sääʹmvuuʹd jieʹllemviõkksažvuõđ seillmõõžž da veâhssummuž. Šuurmõs pieʹǩǩ nuõrin jäälast sääʹmvuuʹd äälǥbeäʹlnn da tuäivam, što kaunnâp naaʹlid paaimted sääʹmnuõrid jäälõõttâd dommvoudda. Sääʹmǩiõl sââʹj pueʹrummuž da nuõri kulttuuridentiteeʹtt veâhssummuš liâ täʹst ååʹn pââimõssân.

Tuäivam, što 20 eeʹjj ǩeeʹjjest leäm tuâjast kulttuur da õhttsažkååʹdd aaʹšši mieʹldd.

Mon tuʹǩǩääm ääiʹjpooddin jäänmõsân čõõučâst.

Miõllsumõs ǩeʹrjjan lij ååʹn Tina Harneskin Lumeenkylväjät.

Toiʹmmai nuõrisuåvtõõzz  vuäzzliʹžžen  tåimmpââʹjest 2024-2025.