Seksuaalʼlažvuõđ sääʹnnǩeʹrjj

Narodleett nuõrid jurddum seksuaalʼlaž sääʹnnǩeʹrjj käunnai ååʹn še Lääʹddjânnmest mainstem sääʹmǩiõlin.

Nuõrisuåvtõõzz teeʹmmen eeʹjjest 2018 tuåimmji seksuaaltiõrvâsvuõttääʹšš. Nuõrisuåvtõs haaʹlad še smeʹllkâʹtted sääʹmnuõrid mainsted sääʹmǩiõl. Täʹst šõʹdde nåkam jurddi: Jåårǥlââʹttet Narodleett nuõrid jurddum seksuaalʼlažvuõđ sääʹnnǩeʹrjj sääʹmǩiõʹlle!

Sääʹnnǩiiʹrjid jåårǥlõʹtteš jeäʹrben juurdeeʹl nuõri sääʹmǩiõllsa seksuaalvuäʹpstõõzz taarbid. Seksuaalʼlaž šõddmõš lij õhtt tääʹrǩes vueʹss oummu šõddmõõžž. Seksuaalʼlažvuõʹtte kuõskki ääʹšš liâ kuuitâǥ leämmaž tabu jeäʹrben sääʹmõhttsažkååʹddest. Tõin lij vuäittam leeʹd vaiggâd mainsted, jiâ-ka ođđ temma kuõskki saaʹnid leäkku vieʹltǩani leämmaž sääʹmǩiõllsaž vasttõõzz. Sääʹnnǩeʹrjjtuej veäkka nuõrisuåvtõs da Narodlett tuäivva, što seksuaalʼlažvuõđâst da tõõzz kuõskki aaʹššin leʹčči uuʹcces lääuʹǩ veeʹrd hiâlpab mainsted ååʹn še sääʹmǩiõʹlle.

Sääʹnnǩiiʹrji jåårǥlâttmõʹšše kuʹlle jiânnai terminologiatuâj, ǥu puk sääʹnnǩeeʹrjest åårrai sääʹn jie võl leäkku âânnmõõžžâst leʹbe noormtum. Sääʹnnǩiiʹrji jåårǥlõõzz lie valmštõõvvâm kõrr tuâj puåđõssân iiʹjji 2018 da 2019 poodd. Jåårǥlâʹttemtuâjast tuejjeeš õhttsažtuâj Sääʹm Ǩiõllkaʹlddjin.

“Leäm samai toođvaž, što vuäǯǯap nuõrttsääʹmǩiõʹlle ođđ seksuaalsannõõzz. Sääʹn lie leämmaž õuddâl samai occanj, mõõn diõtt juʹn tåʹlǩ jåårǥlâttmõš lij leämmaž vaʹǯǯtõsnallšem. Vaʹǯǯtõsvuõđâst čuäʹjat juʹn tõt, što ǩiõttʼtõõllâmnallšem sääʹnnliʹstte nårrje õhtseʹžže 441 sääʹn, koid leäʹp nuõrttsääʹm ǩiõlljuâǥǥtõõzz såbbrin ǩiõttʼtõõllâm. Seksuaalʼlažvuõʹtte kuõskki aaʹššin jeät leäkku ääiʹjab saaǥǥstõõllâm da tõt kuâsttji še vueʹjj ǩiõlltuâjast: jåårǥlõõzzid lij leämmaž vaiggâd kaunnâd da jiânnai lie õnnum vuõiʹǧǧest läiʹnnsääʹn. Koid-ne saaʹnid lie leämmaž määŋg vaajtõsmääin, kooi uuʹcces miârktõsjeäʹrdõõzzin leäʹp ooccâm teâđaid.” särnn nuõrttsääʹm ǩiõlltuâjjlaž Mervi Semenoff sääʹnnǩiiʹrji jåårǥlâʹttemproseezzâst.

 

Sääʹnnǩeʹrjj nuõrttsääʹmǩiõʹlle

Sääʹnnǩeʹrjj tâʹvvsääʹmǩiõʹlle

Sääʹnnǩeʹrjj aanarsääʹmǩiõʹlle

Sääʹnnǩeʹrjj lääddas

Puõʹtte-a kõõččmõõžž miõʹlle?

Leʹččiǩ-a älšmam õhttsažtuejast nuõrisuåvtõõzzin?

Ota yhteyttä


Teeʹmest lââʹzz