DigiÁrran-haahâ

Haavâ ääigi vuávájuvvojii säminuorâi oovtâviärdásiih nuorâipalvâlusah sämikielâlii tiätu- já ravvimpalvâlus já digitallii nuorâipargo peht. Ton vuáđun kevttui sämikuávlust jo leijee digitallii media já uđđâ mediavuáđui mättim. Oovtâviärdásâšvuotâ olášittui väldimáin huámášumán sämikielâid digitalpirrâsijn já tooimâst. Haavâ váimusjuurdân lâi, et nuorâin lii vuoigâdvuotâ jieijâskielâsii digitalkulttuurân.

Haavâ tooimah vuoijuu iärrás lasseen ovdediđ säminuorâi viärdásâštieđettem, lasettiđ väldiaalmug almolii tiäđu sämmilijn já säminuorâin, ovdediđ sämmilii digitallii nuorâipargo já šoddâdiđ sämikielâlii tiätu- já ravvimpalvâlus säminuoráid. Ton lasseen haavâ ääigi pilotistojii sämikielâliih viermispellâtábáhtusah já e-valastâllâmtoimâ sehe olášittojii digitalteknik-, digitalliii muusik- já koodamkerhoh Ucjuuvâst.

Sämikuávlust digitallii nuorâipargo kevttim lii vala vääni. Haahâ sihtij tiäđu já mättim jyehimân já oovdedmân sämmilij päikkikuávlust nuorâi, nuorâipargei já digitalpyevtittem áámmátlij kooskâ.
Haavâ ääigi olášittojii neeljikielâliih (nuorttâlâškielâ, anarâškielâ, tavekielâ já suomâkielâ) tiätu- já ravvimsijđoh www.nuor.fi. Siijđoh olgosadeluvvojii ive 2019 sämikielâi oho ääigi. Siijđoi teeman lii siärváduvlâšvuotâ já toh láá čuosâttum puoh säminuoráid aassâmsaajeest sorjohánnáá. Nuorâi tiätu- já ravvimpargo lii estee nuorâipargo, mii fáálá tiäđu, stivrim já ravvim jieškote-uvlágán koččâmušâin já tilálâšvuođâin, moh kuleh nuorâi elimân. Tiätu- já ravvimsiijđoi ohtâvuođâst pilotistui il. sämikielâlâš juávkkuchat-toimâ já pyevtittui siskáldâs, mii lohtâs seksualtiervâsvuotân.

”Ohtâ Sämitige nuorâirääđi tehálumosijn pargoin lii tuárjuđ já nanodiđ säminuorâi identitet já oohtânkulleevâšvuođâ nuorâi aassâmsaajeest sorjohánnáá. Tiätu- já ravvimpalvâlussáin fálloo säminuoráid äigikyevdilâš tiätu sii jieijâs eenikielân. Tehálâš uási Nuor.fi-palvâlusâst lii meid faallâđ (suomâkielâlii) tiäđu sämikulttuurist já sämmilij vuoigâdvuođâin meid tooid, kiäh iä monnii suujâ keežild lah oppâm eenikielâs. Siijđoh fäälih máhđulâšvuođâ uápásmuđ jieijâs kielân já kulttuurân nuorâi várás pyevtittum siskáldâs peht. Nuorah meid uásálisteh siskáldâs pyevtitmân, já ton keežild siskáldâs sulâstit mii siärváduv.

 

Siärváduv táárbuh nubástuveh ovttuu já meid nuorâirääđi kalga viggâđ västidiđ taaid tárboid. Sämikielâliih palvâlusah pyehtih nuorâ elimân oohtânkulleevâšvuođâ tobdo, tiäđu ellee kulttuurist já jieijâs vuoigâdvuođâin. Mij halijdep movtijdittiđ nuorâid uápásmuđ jieijâs kulttuurân já identitetân vuovvijn, mii lii sijjân puoh luándulumos; digitalisaatioin.”

Anni-Sofia Niittyvuopio
Nuorâirääđi saavâjođetteijee

DigiÁrran-haavâ (2016-2020) ruttâdij Laapi kuávluhaldâttâhvirgádâh, Sämitige škovlim- já oppâmaterialtoimâttâh já nuorâirääđi.