Veikâ sämmiliih sierâ enâmij kuávlust láá ohtâ aalmug, te mij iäránep nubijnân eereeb iärrás kielâ, suuvâ já/tâi pihtâsij uásild. Anarâškielâ lii áinoo tuše Suomâst sarnum sämikielâ já anarâšah láá ain aassâm Aanaarjäävri pirrâ. Kielâ iäláskittem oovdân pargeh aktiivlávt, mutâ tast-uv huolâhánnáá kielâst láá suulân 450 sárnod.
Nuorah kuittâg halijdeh oppâđ eenikielâs já siärváduvâs ärbivuovijd. Kielâ uáinoo sosiaallii mediast já Yle Sápmi uđđâsijn. Toos lasseen mij uážžup kuullâđ anarâškielâlii rap-muusik, luuhâđ kiirjijd já kuullâđ kielâ sämmilij tábáhtusâin. Tun puávtáh kuullâđ livđe-oovdânpyehtimijd tâi Anarist käävpist-uv ulmuid sárnumin kielâ. Mááccuheh já taaiđâ kunnijâteh ärbivuovijd, mutâ vääldih vaikuttâsâid pirrâ maailm uáinojeijee muotialmonijn. Šoddâdem já škovlim uásild kielâ lii máhđulâš oppâđ kielâpiervâlist kidâ ollâopâttuv räi. Kielâ iälá noonâ uássin siärváduv.
Anarâškielâ ij lah innig “vaanhimij syeligâs kielâ”, mon kuulâi tuše pääihist já maid ubâ ááhuh já äijiheh iä veltihánnáá sárnum. Sämitigge nomâttij moonnâm ive nelji sámásteijee, kiäh hästih ruokkâdávt kevttiđ sämikielâid. Ohtâ taggaar sámásteijee lii anarâškielâlâš Sáárá Seipiharju. Sun muštâl, ete teiniavveest sun halijdij leđe tego iärráseh-uv, mutâ ij innig. Kielâ sárnum lii puáhtám sunjin ennuv máhđulâšvuođâid elimist já kielâ vievâst sun lii, kii sun lii.
”Anarâškielâ lii adelâm munjin nuuvt mielâttes ennuv máhđulâšvuođâid čäälliđ mainâsijd, porgâđ toimâtteijeepargoid já lávluđ párnáiskiärust. Jiem osko, ete taah ääših liččii lamaš máhđuliih, jis mun jiem mátáččii anarâškielâ. Mun jiem lah kuássin poollâm, ete munjin ij liččii pargosaje puátteevuođâst. Anarâškielâg ulmuid lii ain tárbu. Mun jiem liččii mun, jis mun jiem sárnuččii anarâškielâ. Anarâškielâ lii stuorrâ uási muu, já tom kii mun lam.”
Sáárá oovdânpyehtim tun puávtáh keččâđ Youtubest Sämitige kanavast:
Sofe Hánssa Sampo Ánne-Sofe, nuorâirääđi saavâjođetteijee
