Sämitigge haalijd pajediđ sämikielâid uáinusân já lii nomâttâm neelji sämikielâlii kielâuápisteijee. Sámásteijeeh tuáimih mijjân ovdâkovveen já hästih mii sámástiđ ruokkâdávt. Jyehi sámásteijee lii kuvvim smavvâ video. Videost sii muštâleh jieijâs ohtâvuođâst sämikielân.
Sámásteijee Sáárá Seipiharju
Sáárá kielâpäälgis aalgij kielâpiervâlist. Talle sun vuolgij vuáđuškoovlân anarâškielâg luokan. Luvâttuvâst sun aalgij ain pyerebeht iberdiđ, maggaar anarâškielâ tile lii já mon tehâlâš kielâ iäláskittem lii.
”Anarâškielâ lii adelâm munjin nuuvt mielâttes ennuv máhđulâšvuođâid, čäälliđ mainâsijd, porgâđ toimâtteijee pargoid ja lávluđ párnái skiärust. Jiem osko, ete toh ääših liččii lam máhđuliih, jis jiem mátáččii anarâškielâ. Jiem lah kuássin poollâm, ete munjin ij liččii pargosaje puátteevuođâst. Anarâškielâg ulmuid lii ain tárbu. Mun jiem ličij mun, jis jiem sárnuččii anarâškielâ. Anarâškielâ lii stuorrâ uási muu, já tom, kii mun lam.”
Ive 2019 ávuduvvoo OA algâaalmugkielâi ihe. Teemaive tárguttâssân lii pajediđ oovdân maailm algâaalmugkielâi tile. Ulmen lii teemaive peht eereeb iärásij lasettiđ tiäđulâšvuođâ algâaalmugkielâin já toi uhkevuálásâšvuođâst já ovdediđ já standardistiđ kielâid. Maailm suulân 6700 kielâst paijeel 40 % láá uhkevuálásiih. Tain iänááš uási láá algâaalmugkielah.