Hei! Mun lam Ville Risten Pirkko Anne, Anne Olli. Mun lam tääl 26-ihásâš. Mun lam pajasšoddâm Avelist, mutâ tääl lam aassâm Oulust jo masa 8 ihheed. Mun oopâm tääbbin biologia amnâsmáttáátteijen. Muu elimist uápuh iä kuittâg oro lemin válduroolist, ko lam uáli čeppi kulâttiđ ääigi sierâlágán toimâiguin. Mun tarvanâm viehâ mielâstân já váhá vahâgist-uv sierâlágán projektáid (Sápmi Pride jna...), moh láá puáhtám muu elimân uáli ennuv siskáldâs já uđđâ feerimijd. Toos lasseen mun lam fyysilávt-uv viehâ aktiivlâš – mun jođám roller derby – hárjuttâsâin kulmii ohhoost já agilityst ohtii ohhoost jieččân hárjuttâsâin já ohtii máttáátmin iärásijd. Te oholoopah maneh maŋgii spellâmreeisust já kištoin.
Muu elimist tij pesâvetteđ kale kuullâđ lase-uv. Já uáiniđ-uv. Uđđâsumos hástusin mun algâttâm vloggađ tâi tubettiđ Nuorâirááđán. Tot lii jiäráskittee já mun lam tast hirmâd ilolâš! Mutâ vuossâmužžân mun kolgim-uv smiettâđ, ete maht tom tubettem kolgâččij algâttiđ ? Must lii šiev já melgâd uđđâ puhelin, Huawei P20, te jurdâččim kevttiđ tom videoi kuvviimân. Must lii šiev kamera-uv, Nikon D3100, mutâ oroi älkkeebin kuvviđ puhelimáin já luođiđ videoid tast tiäturân. Tondiet väljejim kuvvim toin.
Tom tiettim jo valmâšin, ete puhelimân kannat uástiđ tubettem várás sierâ mikrofon já jyelgi. Uccâ puhelinjyelgi mun ostim Clas Ohlsonist moddijn euroin. Čuávuvâžžân mun seelvâtškuottim googlest, ete maggaar mikrofon mun talle kolgâččim uástiđ – “tubetus mikrofoni älypuhelin”, enter. Mun huámmášim, ete maaŋgah tain mikrofonijn lijjii uáivildum njuolgist puhelin peljipilttolabdemân. Muu puhelimist kalga leđe tađe várás adapter, tastko maŋgii uđđâsumos puhelimijn ij innig lah tot 3,5 mm stuárusâš räigi, tuše ohtâ räigi puhelin luođim várás. Tondiet mun karttim raijiđ tiätulágán mikrofonijd ollásávt meddâl. Mottoom kooskâst mun iärdojim ollásávt mikrofonij ucâmân neetist, já meridim-uv vyelgiđ pääihi oolâ Verkkokauppa.comin – motomin kaavpugeellim-uv lii ávhálâš! Tobbeen talle peessim uáiniđ sierâlágán muulsâiävtuid já smietáim oovtâst vyebdein, ete miisun ličij munjin pyeremus muulsâiähtu. Poođijn ton puátusân, ete Rode Wireless Go. Tast láá kyehti uási, main nubbe puátá kiddâ puhelin adapterân já nube uási puáhtá kiddiđ om. pihtâsáid.
Mun halijdim tiäđust-uv peessâđ keččâliđ muu uđđâ mikrofon tállân, mutâ aalgâst ferttejim luođiđ kuohtuid oosijd. Talle peri keččâliđ! Mun imâštâllim, ete mane jienâ kvaliteetist ij oro tábáhtuumin mihheen mikrofonist huolâhánnáá. Mun valdim oppeet google kiävtun, já huámmášim, ete ličij kolgâm uástiđ mikrofon já puhelin várás monnii TRS-TRRS -adapter-uv, mutâ tom iä huámmášâm vyebdeeh muštâliđ Verkkokauppa.comist. Šuáhkádim. Na čuávuváá peeivi mun eellim uástimin adapter, já talle vyeijiláin-uv muu usteváin Juhâmohe tälvimarkkânáid. Määđhi alne mun keččâlim kuvviđ mikrofonáin, mutâ muu puhelin ij reagistâm toos ollágin. Mun keččâlim muu ustev puhelin. Tast mikrofon tooimâi. Čuávuvâžžân mun smiettim, ete lii-uv muu puhelin adapter cuovkkânâm, já seelvâtškuottim, ete kost Ruotâbeln puávtáččij uástiđ uđđâ. Haaparantaast vuobdii sehe Ica Maxist ete Dollarstorest adapterijd tuše iPhone várás. Mätki jotkui, já Boden Elgigantenist talle luhhoost kavnui adapter. Mätki jotkui oppeet, já keččâlim ete maht mikrofon toimâškuát. Tääl muu puhelin kale reagistij toos, mutâ videost ij kullum eres ko “zŽŽzzžŽŽŽzZZžžžžŽŽ”. Na nuuvt. Miisun taan tove lii puástud. Algim smiettâđ, ete jiem kale lah luođim muu puhelin peividmijd kuuuuhes ááigán, já te luođiiškuottim taid. Tast moonâi-uv masa oles loppâmätki, mutâ ton maŋa mikrofon viijmâg toimâškuođij muu puhelimist!
Juhâmohheest mun te viijmâg peessim olmânáál algâttiđ kuvvim. Mätki lâi uáli suotâs, veikâ tot lâi-uv liijkás uánihis. Tääl vala máttááttâllâm editistiđ videoid tiäturáin – čuávuváá tove ko kulâvetteđ must, te tuáivui mield mun lam talle mottoom verd jo oppâm!
Taan muštâlus tehálumoseh máttááttâsah láá taah:
1) tubettem algâttem ij lah älkkee
2) kannat motomin luođiđ taid puhelin peividmijd.