Hei! Mon leäm Ville Ristena Pirkko Anne, Anne Olli. Leäm ååʹn 26-ekksaž. Šõʹddem Âʹvvlest, leâša ååʹn leäm jälstam Oulust juʹn miâlggâd 8 eeʹjj. Mättʼtõõđam tääiʹben biologia aaunâsuʹčteeʹlen. Muu jieʹllmest ij kuuitâǥ kuõsttu, što määtt leʹčče väʹlddroolâst tõn diõtt, ko leäm samai čeäʹpp ââʹnned ääiʹj juõʹǩǩnallšem tuåimid. Vuâlǥam mieʹldd samai miõlstan da siõmmna säʹttnalla še jeeʹresnallšem projeeʹktid (Sápmi Pride dno...), mõõk lie pohttam muu jieʹllma tuõđi jiânnai siiskõõzz da ođđ ǩiõččlâsttmõõžžid. Tõn lââʹssen leäm fyyslânji še miâlggâd aktiivlaž – mon jååđam roller derby -harjtõõzzin kooum vuâra neäʹttlest da agilityst õʹhttešt neäʹttlest jiijjân harjtõõzzin da õʹhttešt škooulteʹmen jeärrsid. Neäʹttel-loopp mâʹnne täujja speâllreeisain da ǩeâšttjõõđeeʹl.
Muu jieʹllem pirr piâssveʹted kâʹl kuullâd lââʹzz. Da vueiʹnned še. Alttääm-ba ođđsumõs väʹǯǯtõssân vloʹggjed leʹbe tubetâʹstted Nuõrisuåvtõʹsse. Tõt lij miõl ǩieʹssi da rämmšam čuuʹt! Leâša vuõssmõsân jouddum smiõttâd, što mäʹhtt-son tõn tubetâsttmõõžž õõlǥči altteed? Muʹst lij šiõǥǥ da miâlggâd ođđ teʹlfon, Huawei P20, de juʹrddem ââʹnned tõn videoi fiʹlmmjummša. Muʹst kâʹl käunnai šiõǥǥ kamera še, Nikon D3100, leâša juʹrddem, što lij hiâlpab fiʹlmmjed teʹlfoonin da laaddâd videoid tõʹst teâttmašina ool. Tõn diõtt vaʹlljeem tõin fiʹlmmjed.
Tõn tiõʹttem-i juʹn valmmšen, što teʹlfooʹne kaʹnnat vuäʹstted vloʹggjummuž vääras pååđmikrofoon da jueʹlj. Siõm teʹlfoonjueʹlj vueʹsttem Clas Ohlsonist muäʹdd eeuʹrin. De aʹlǧǧem väʹldded googlein seeʹlv, måkam mikrofoon mon õõlǥčem vuäʹstted – “tubetus mikrofoni älypuhelin”, enter. Vuâmmšem, što määŋg täin mikrofoonin leʹjje jurddum piijjâd vuõiʹǧǧest teʹlfoon kuulokeliitäntään. Muu teʹlfoonâst âlgg leeʹd tõn vääras adapter, tõn diõtt ko täujja ođđsumõs teʹlfoonin ij teänab leäkku tõt 3,5 mm šoora reäiʹǧǧ, peʹce tåʹlǩ õhtt reäiʹǧǧ teʹlfoon laaddâm vääras. Tõn diõtt muʹst feʹrttji rääʹjted tiõʹtti mikrofoonid obbnes meädda. Måtam poodd čuuʹt vuârsǩem mikrofooni tuʹtǩǩummša neeʹttest, da vaʹlljeem vueʹlǧǧed pääiʹǩ ool Verkkokauppa.com-kauʹppe – Måtmešt gååradjieʹllem lij äukkai! Toʹben pieʹssem vueiʹnned jeeʹresnallšem vaajtõsmääinaid da smiõttim õõutveäkka kaaupšeeʹjin, što mii-son muʹnne leʹčči pueʹrmõs vaajtõsmäinn. Pueʹđim tõn puåđõʹsse, što Rode Wireless Go. Tõʹst lie kueʹhtt vueʹzz, koin nuʹbb puätt ǩidd teʹlfoon adapteera da nuʹbb vueʹzz vuäitt piijjâd ǩidd ouddm. pihttsid.
Haaʹleem teâđast piâssâd ǩiččlõddâd muu ođđ mikrofoon tâʹlles, leâša aalǥâst feʹrttjem laaddâd kuhttuid vuõʹzzid. Mâŋŋa dõõʹst pâi ǩiččlõddâd! Õõmšem, mõõn diõtt jiõnn kvaliteeʹttest ij kollʼjam ni måkam jeäʹrdõs mikrofoonâst huõlǩani. Vaʹlddem eʹpet google ââʹnnma, da vuâmmšem, što leʹččem õlggâm vuäʹstted mikrofoon da teʹlfoon vääras måtam TRS-TRRS-adapteeʹr še, leâša tõn pirr jie hoʹhssjam kaaupšeei muʹnne peäggted Verkkokauppa.comist. Luõikstem. Na nuuʹbb peeiʹv jeällõʹččem vuäʹsttmen tõn adapteeʹr, da mâŋŋa juʹn vuejjlim muu naʹzvaanin Jokkmååʹǩǩ täʹlvvmarkknid. Määʹtǩ âʹlnn ǩiččlõʹddem fiʹlmmjed mikrofoonin, leâša muu teʹlfoon ii rekisterâsttam tõn ni voops. Ǩiččlõʹddem muu naʹzvaan teʹlfoon. Tõʹst mikrofoon tuåimmji. Pueʹtti juurd muʹst leäi, što lij-a muu teʹlfoon adapter muärrjam, da aʹlǧǧem väʹldded seeʹlv, koʹst Ruõcc peäʹlnn piâzzči vuäʹstted ođđ adapteeʹr. Haparandast kaaupše nuʹtt Ica Maxist ko še Dollarstorest adapteeʹrid tåʹlǩ iPhonei vääras. Mäʹtǩǩ juätkkji, da Boden Elgigantenist leekkast käunnʼji adapter. Mäʹtǩǩ juätkkji eʹpet, da ǩiččlõʹddem, mäʹhtt deʹbe ååʹn mikrofoon tuåimmješkuätt. Ååʹn muu teʹlfoon kâʹl rekisterõõʹsti tõn, leâša videost ij kollʼjam jeeʹrab ko “zŽŽzzžŽŽŽzZZžžžžŽŽ”. Na nuʹtt. Mii-son de tän vuâra lij puästtad. Smiõttškueʹttem, što jiõm kâʹl leäkku laaddâm teʹlfoon peeiʹvtummšid kuuuuʹǩes ääiʹj sizz, da aʹlǧǧem tõid laaddâd. Tõʹst mõõni-i miâlggâd lopp-mäʹtǩǩ, leâša tõi mâŋŋa mikrofoon aaʹlji mââimõsân tuåimmâd muu teʹlfoonâst!
Jokkmååʹǩǩest pieʹssem mââimõsân kuddnalla altteed fiʹlmmjummuž. Reiss leäi samai hääʹsǩ, håʹt-i tõt leäi čuuʹt vuäʹniǩ. Ååʹn veâl mättʼtõõđam editâʹstted videoid teâttmašinain – pueʹtti vuâra ko kuullveʹted muu pirr, leäm tuäivvmest juʹn måtamnalla mättjam tõn!
Täk lie tän mainnâz tääʹrǩmõs mättʼtõõzz:
1) tubetâʹsttem alttummuš ij leäkku hiâlpp
2) kaʹnnat måtmešt laaddâd tõid teʹlfoon peeiʹvtummšid.