Mun lean Anne ja mus boahtá tubeteaddji

Hei! Mun lean Ville Ristena Pirkko Anne, Anne Olli. Lean dál 26-jahkásaš. Bajásšadden Avvilis, muhto dál lean orron Oulus jo measta 8 jagi. Stuđeren dáppe biologiija ávnnasoahppaheaddjin. Mu eallimis oahpput eai goitotge oro álo leamen váldorollas, danin go lean hui čeahppi golahit áiggi iešguđetlágan doaimmaiguin. Darvánan hui millosit ja vehá vahágisge earálágan prošeavttaide (Sápmi Pride jna...), mat leat buktán mu eallimii hui olu sisdoalu ja ođđa vásáhusaid. Dasa lassin lean fysalaččatge oalle aktiivalaš – mun jođán roller derby -hárjehusaiguin golbmii vahkus ja agilitys oktii vahkus iežan hárjehusaiguin ja oktii skuvlemin earáid. Vahkuloahpat golletge dasto dávjá spealloreaissuin ja gilvvohallamiin.

Mu eallima birra beassabehtet gal gullat lasige. Ja oaidnitge. Ođđaseamos hástalussan álggán oainnát vlogget dahjege tubbet Nuoraidráđđái. Dat lea gelddolaš ja lean das hui ilus! Muhto vuostamužžan gárten smiehtat, ahte moson dan tubbema galggašii álggahit? Mus lea buorre ja oalle ođđa telfon, Huawei P20, de jurddašin geavahit dan videoid govvemii. Mus gal gávdno buorre kamerage, Nikon D3100, muhto orui álkit govvet telfonin ja luđet videoid das dihtorii. Danin válljejin dainna govvet.

Dan dihtenge jo valmmášin, ahte telfonii gánneha oastit vloggema várás sierra mikrofovnna ja juolggi. Unna telfonjuolggi osten Clas Ohlsonis moadde euroin. Čuovvovaččat álgen váldit googlein čielgasa, makkár mikrofovnna mun dasto galggašin oastit – “tubetus mikrofoni älypuhelin”, enter. Fuomášin, ahte mánggat dáin mikrofovnnain ledje oaivvilduvvon biddjat njuolga telfona kuulokeliitäntään. Mu telfonis galgá leat dan várás adapter, danin go dávjá ođđaseamos telfovnnain ii šat leat dát 3,5mm sturrosaš ráigi, baicce dušše okta ráigi telfona láddema várás. Dán dihte gárten ráddjet dihtolágan mikrofovnnaid obban eret. Muhtun muttus nearvaluvven ollásit mikrofovnnaid dutkamii neahtas, ja válljejin vuolgit báikki ala Verkkokauppa.comii – muhtumin gávpoteallinge lea ávkálaš! Doppe bessen oaidnit earálágan molssaeavttuid ja smiehtaime ovttas vuovdin, ahte miison munnje livččii buoremus molssaeaktu.  Bođiime dan bohtosii, ahte Rode Wireless Go. Das leat guokte bihtá, main nubbi boahtá gidda telfovnna adapterii ja nubbi bihttá sáhtá biddjat gidda omd. biktasiide.

Háliđin dieđusge beassat geahččalit mu ođđa mikrofovnna dálán, muhto álggos fertejin láddet guktuid bihttáid. Dasto beare geahččalit! Imaštallen, manin jiena kvalitehtii ii orron dáhpáhuvvamen mihkkege mikrofovnnas fuolakeahttá. Válden vuot google geavahussii, ja fuomášin, ahte livččen gusto galgan oastit mikrofovnna ja telfovnna várás muhtun TRS-TRRS -adapterages, muhto dan eai fuomášan vuovdit muitalit munnje Verkkokauppa.comis. Šuovkkihin. Na čuovvovaš beaivve fitnen oastimen dan adaptera, ja dasto vulggiimege mu ustibin vuoddjit Johkamohki dálvemárkaniide. Mátki alde geahččalin govvet mikrofovnnain, muhto mu telfon ii registereren dan olláge. Geahččalin ustiba telfona. Das mikrofovdna doaimmai. Čuovvovaččat de smihten, ahte leago mu telfona adapteri bieđganan, ja álgen váldit čielgasa, gos Ruoŧa bealde beasašii oastit ođđa. Háhpáránddis vuvde sihke Ica Maxis ahte Dollarstores adapteraid dušše iPhoneid várás. Mátki joatkášuvai, ja Bodena Elgigantenis dasto lihkus gávdnui adapter. Mátki joatkášuvai fas, ja geahččalin mo de álgá mikrofovdna doaibmat. Dál mu telfon gal registererii dan, muhto videos ii gullon eará go “zŽŽzzžŽŽŽzZZžžžžŽŽ”. Na nu. Miison de dán háve lea boastut. Álgen smiehtat, ahte in gal leat luđen telfona beaivvádusaid guuuuhkes áigái, ja álgen dasto luđet daid. Das manaige measta olles loahpamátki, muhto daid maŋŋá mikrofovdna álggii viimmat doaibmat mu telfonis!

 

Johkamohkis bessen dasto viimmat álbmaláhkai álggahit govvema. Reaisu lei hui suohtas, váiko dat leige menddo oanehaš. Dál vel oahppahalan editeret videoid dihtorin – čuovvovaš háve go gullabehtet mu birra, de lean doaivumis jo muhtunláhkai oahpan dan!

Dán muitalusa dehálamos oahpahusat leat dá:

1) tubbema álggaheapmi ii leat álki

2) gánneha muhtumin luđet daid telfovnna beaivvádusaid.