Buresboahtin Sámedikki nuoraidráđi neahttasiidduide!

Somá go leat dádjadan min neahttasiidduide! Mii nuoraidráđis illudit go leat beassan rahpat dáid siidduid ja sávvat ahte dat sáhttet fállat dieđuid, guoimmuhit ja leat gulahallanbáikin.

Siidduin gávnnat earret eará dieđuid nuoraidráđi birra, sámenuoraid diehto- ja rávvenbálvalusaid ja videoblokkaid. Maŋŋelis beassat maiddái čálašit ságastallanforumis.

Siiddut leat oassi DigiÁrran-fidnus, mii lea nuoraidráđi ja Guovlohálddahusdoaimmahaga ovttasbargu. Fidnu ja dáid siidduid ulbmilin lea gárgehit sámenuoraid digitála nuoraidbarggu, vai nuorat besset gávnnadit ja oažžut dieđuid váibmogillii. Siidduin leat dieđut earret eará seksuála- ja mielladearvvasvuođaáššiid birra.

Mii leat earenoamáš rámis go beassat almmustahttit viiddes seksuálasátnegirjjiid davvisáme-, anáraš- ja nuortalašgillii! Seksuálasátnegirjjiid gávnnat dáppe.

Nuoraidráđis ja olles Sámedikkis leat ollu doaimmat, mat eai álo oaččo seamma ollu fuomášumi go politihkalaš doaimmat. Sávvat ahte bastit iežamet oasil fállat sámegielat nuoraidbálvalusaid ja čalmmustahttit gollegiellamet neahtas. Orru earenoamáš vuogas almmustahttit siidduid justa dán jagi, Unesco álgoálbmogiid giellajagi.

Diehto- ja rávvensiiddut ovddiduvvojit jotkkolaččat. Váldit vuostá sisdoalloideaid. Juos dus leat ideat siidduid sisdoalu birra, váldde oktavuođa prošeaktabargái.

Buresboahtin loaktit áiggi min siidduin!

 

Sávvá Gáppe Piera Jovnna Gáhteriinná Risten

Nuoraidráđi ságadoalli
21.10.2019


Tutustu myös