Nuoraidráđi čoahkkin 6/2019

Nuoraidráđđi čoahkkimasttii 12.12.2019 maŋemuš geardde dán doaibmabajis. Čoahkkima áššelisttus ledje ee. doaibmaplána ja bušeahttaárvalusa dohkkeheapmi ja evttohusa válmmaštallan lahtuin, geat válljejuvvojit nuoraidráđđái. Evttohus manná sámedikki stivrii ja ain viidáset sámedikki čoahkkimii.

Nuoraidráđi čoahkkin 6/2019

Nuoraidráđđi čoahkkimasttii 12.12.2019 maŋemuš geardde dán doaibmabajis. Čoahkkima áššelisttus ledje ee. doaibmaplána ja bušeahttaárvalusa dohkkeheapmi ja evttohusa válmmaštallan lahtuin, geat válljejuvvojit nuoraidráđđái. Evttohus manná sámedikki stivrii ja ain viidáset sámedikki čoahkkimii. Dasa lassin nuoraidráđđi ságastalai válgabaji mihttomeriid ollašuvvamis. Nuoraidráđđi čoahkkimastá jagis 5-6 geardde ja dán háve čoahkkin dollojuvvui Skype bokte.

 

Doaibmaplána 2020

Jagiid 2020-2021 nuoraidráđđi ásahuvvo Sámedikki čoahkkimis jagi 2020 álggus. Nuoraidráđi lahtuide lea ulbmil lágidit juo baji álggus skuvlejumi Sámedikki doaimmain ja seammás oahpásmuvvat nuoraidráđi sajádahkii Sámedikkis ja maiddái nuoraidráđi doaimmaide ja fitnuide.

Nuoraidráđđi válmmaštallá válgabaji álggus sámi nuoraidpolitihkalaš prográmma, man ulbmilin lea ovddidit sámenuoraid vuoigatvuođaid iežaset gillii ja kultuvrii. Dehálaš temát prográmma válmmaštaladettiin leat sámenuoraid hástalusat joatkit árbevirolaš ealáhusaiguin ja dálkkádatrievdan, sámenuoraid buresbirgejupmi-, seksuála- ja mielladearvvašvuođaáššit, sámegielat nuoraidkultuvrra ovddideapmi ja digitála nuoraidbargu, ja dasa lassin sámekultuvrra ja dieđuid lasiheapmi váldoálbmogii sámiid birra.

Jagi 2020 nuoraidráđđi viggá ovttasbargat čavggabut eará eamiálbmogiiguin álbmogiidgaskasaččat ja viggá ovddidit ovttasbarggu Norgga ja Ruoŧa sámedikkiid nuoraidráđiiguin. Sámi parlamentáralaš ráđi (SPR) nuoraidlávdegotti ságajođihanvuorru lea sirdašuvvan Suoma Sámedikki nuoraidráđđái ja nuoraidráđis lea váldoovddasvástádus konferánssa lágideamis. Konferánsa lágiduvvo Anáris borgemánus. Konferánssa válmmaštallamat leat álggahuvvon ja konferánssa temán leat válljen dálkkádatrievdama. Nuoraidráđđi dieđiha konferánssas válmmaštallamiid ovdánettiin.

Sámenuoraid buresbirgejumi áigut ovddidit joatkimiin ovttasbarggu Álbmotlihtuin (Väestöliitto) ja buvttademiin fáddái laktáseaddji materiála nuoraidráđi dieđujuohkin- ja rávvenbálvalussii. Ulbmilin lea maiddái lágidit skuvlejumi sámenuoraide. Nuoraidráđđi lea maiddái mielde  KeesiČuõvv -kulturvahkkoloahpa lágideamis doarjun ja nannen dihte sámeguovllu olggobealde orru sámenuoraid identitehta. Dáhpáhusa leat plánen lágidit giđđat 2020. Nuoraidráđđi viggá lágidit ovttasbarggus sámeguovlluid gielddaiguin, sámeservviiguin ja sámedáhpáhusaiguin  sámenuoraide doaimmaid, maidda lea álki searvat. Doaimmat ollašuhttojuvvojit De-fitnu vuođul ja dat ovddidit sámegielat nuoraidkultuvrra.

 

Nuoraidráđis leat jođus jagi 2020 guokte sierra fitnu:

 

Dihtosis- Sámekultuvra oahpisin

Nuoraidráđđi lea ožžon Oahpahus- ja kulturministeriijas 53 800 € sturrosaš ruhtadeami Dihtosis-skuvlagalledeamit -fidnui áigodahkii 1.7.2019-30.6.2020. Fidnu ollašuhttojuvvo ovttas Nuoraid Akademiijain. Fitnu bokte vigget dahkat sápmelaččaid ja sámekultuvrra oahpisin váldoálbmotnuoraide. Fitnu nuppi jagi skuvlagalledemiid várás beaivvádahttojuvvo juo gárvves materiála, ollašuhttojuvvojit skuvlagalledeamit ja searvadeaddji bargobájit, ja ráhkaduvvo sámefáttát mobiilaspeallu, mii lanserejuvvo sámiid álbmotbeaivve riikkaviidosaččat Suoma skuvllain.

DigiÁrran 

Nuoraidráđđi lea ožžon Lappi guovlohálddahusdoaimmahagas (AVI) DigiÁrran-fidnui 21 500 € ruhtadeami geavahuvvot áigodagas 1.12.2019-30.11.2020. DigiÁrran-fidnu viggá gávdnat digitála nuoraiddoaimma málle sámeguovllus. Jagi 2020 dieđujuohkin- ja rávvensiiddut ovddiduvvojit ain. Sámenuoraid searvadit siidduid ovddideamis ja sisdoalu buvttadeamis. Digitála nuoraidbarggus berre váldit vuhtii nuoraid vuoigatvuođa iežasgielat digitálakultuvrii. Sámegielat ja sámenuoraide oaivvilduvvon nuoraid dieđujuohkin- ja rávvenbálvalus lea ovdal váilon ollásit.

Tutustu myös