Reetta Tornensis
Reetta Tornensis lij 26-ekksaž da mättʼtõõttâm Oulu pââimõs-škooulâst Giellagas-instituuttâst sääʹmkulttuur. Son lij leämmaž tuâjast Tromssast Tâʹvv-Taarr čeäppõsmuʹzeeʹjest da sõrgg son alttad teeʹmes ǩiõtt-tuâjai määttaid Jokkmokist Samernas utbildningscentrumist. Suu miõl ǩeäss jeäʹrben duodji, muʹzeeʹji ooudâsviikkmõš da še ǩiõtt-tuâjai miârkâlvuõđ õuʹdde põhttmõš. Tornensis vuäinn nuõrisuåvtõõzz samai pueʹrr sââʹjjen vaaikted sääʹmnuõri aaʹššid, da škooultõõzzâs mieʹtt suʹst lij šiõǥǥ vuâđđ toiʹmmjed nuõrisuåvtõõzzâst.
Tobdstõõđ še
Anette Kosonen
Anette Kosonen lij Kuttura ååraž mättʼtõõtti. Son jäälast ååʹn Vuâččast da mättʼtââtt ǩiõtt-tuâjaid SŠK:âst, koʹst mättʼtõõttâd võl õõut eeʹjj ääiʹj. Nuõrisuåvtõõzz tuâjast suu motivâstt sääʹmnuõrivuiʹm reâuǥõõttmõš di tõt, što aaʹššid peäss vaaikted määŋgpeällsânji.
Hánsa Pieski
Uccjooǥǥâst åårrai Hánsa Ravna-Pieski lij tuäiv mieʹldd ǩiõrggneʹmmen pâʹjjmättʼtõõttjen Uccjokknjääʹlm sääʹmlookkjiškooulâst ǩeâđđa 2021. Samai ååʹn Hánsa lij levvjam ǩeʹrjjtõõzzin da kåitt siõmmna luäʹneed. Frijjäiʹǧǧen son määšš friskksmempõõrtâst da naʹzvaanivuiʹm. Še kueʹllšeellmõš ǩeäss mõõn-ne veeʹrd Pieski miõl. Teänjokk lij vääžnai suʹnne da suu âlddsid. Pieski haaʹlad lââʹzzted pääiklai kueʹllšeeʹllemvuõiggâdvuõđid. Pieski lij ååʹn nuõrisuåvtõõzzâst vuõssmõs pââʹjes äʹšštobddivuäzzliʹžžen.
Jussa Seurujärvi
Jussa Seurujärvi lij Päärtõk ååraž, koʹst son še ååʹn jäälast. Son lij jeällam škooul aanrõsǩiõllsaž klaassâst Aanrest da mättʼtõõttâm Kaamsest puäʒʒtääl liinjâst. Son lij puäʒʒooumaž Muddusjääuʹr paalǥâskååʹddest. Seurujärvi lij nuõrisuåvtõõzzâst ååʹn neelljad pââʹjes. Seurujärvi vuäinn, što nuõrisuåvtõõzzâst ǩiõttʼtõõlât samai vääžnai aaʹššid da son haaʹlad leeʹd mieʹldd vaikkteʹmmen. Nuõrisuåvtõõzz meeraikõskksaž õhttvuõđ, mâʹte ÕM kueʹssreiss Sveiʹccjânnmest, da jeeʹres säiʹmmõõzz poʹhtte lââʹssen ärvvsaž ǩiõččâmvueʹjj tuõjju.
Sunna Siilasjoki
Ergona Duommá Ándde Duommá Sunna Siilasjoki jäälast Karesâvvnest. Son mättʼtââtt liâdggšiõtteeʹjen da äigg puõʹttiääiʹjest juäʹtǩǩed puäʒʒhoiʹddjummuž. Suu miõl ǩeäss puäʒʒhååid lââʹssen luâtt, sääʹmǩiõll da ǩiõtt-tuâjj. Vaikktemvueiʹttemvuõđ nuõri aaʹššid motivâʹstte suu nuõrisuåvtõõzz tuâjast. Še jeeʹresnallšem projeeʹkt, koin nuõrisuåvtõs lij mieʹldd, älšmõõʹtti mieʹldd tuåimmjummša.
Riku Laiti
Riku Laiti mättʼtââtt matematiikk Oulu Universiteeʹtest viiđad eeʹjjes. Son äigg puõttiääiʹjest matemaattla tiõđi aunnâzuʹčteeʹlen. Son naaudaš tuâjstes nuõrisuåvtõõzzâst jeäʹrben ođđ vuäinlmi diõtt, kook toʹben ävvne.
Maria Mäkinen
22-ekksaž Maria (Mäʹrjj) Mäkinen jäälast Jyväskylä gåårdest, koʹst son lij jälstam čõõđ ääiʹj. Tõn diõtt suu miõll ǩeäss sääʹmvuuʹd åålǥbeäʹlnn jälsteei sääʹmnuõri aaʹššid. Mäkinen lij ååʹn kuälmad pââʹjes nuõrisuåvtõõzzâst. Tâʹlles aalǥâst juʹn suu miõll ǩieʹssi mieʹldd älšmâttmõš teivvad jeeʹres sääʹmnuõrid da vaaikted aaʹššid õõutâst.
Ante Tenoranta
Ante Tenoranta lij Karigasnjaarǥ ååraž da mättʼtââtt Uʹccjooǥǥ sääʹm lookkjiškooulâst. Tenoranta haaʹlii mieʹldd nuõrisuåvtõʹsse, ǥu suʹst miõl ǩeäss leeʹd mieʹldd vaaikteʹmmen sääʹmvuuʹd nuõri pueʹrrjieʹllma. Täʹst son vuäinn sääʹmǩiõllsaž luõvâsääiʹj tuåim määŋgpeällsen tuejjeem vääžnai äʹššen.
Marianne Ketola
Marianne Ketola jäälast Karesâvvnest, koʹst son lij jälstam ââʹǩǩpââʹjjes. Son mättʼtââtt Taarâst Sääʹmm õllškooulâst journaliism. Puäʒʒhåidd lij tuõđi vääžnai Ketolaaʹje da tõt lij jõnn vueʹss suu jieʹllem. Sääʹm ǩiõll lij nuʹbb älšmõõtti Ketola tuâjast. Son peʹcclâstt sääʹmǩiõl jieʹllemviõǥǥâst da Ketola tätt-i oouʹdeed ǩiõl da smeʹllkâʹtted še jeeʹres nuõrid tõõzz. Nuuʹbb paajâs nuõrisuåvtõõzzâst tuejjeei Ketola inspirâstt vueiʹnned ko ääʹšš mottješkueʹtte. Son mušttat, što nuõri jurddi lie miârkteei: seeʹst lie jieʹrmmes jurddi da lij vääžnai kuvddled, mäʹhtt nuõrroummui aaʹššid vuäiʹnne.
Lassi-Olavi Mäkinen
Lassi-Olavi Mäkinen lij Âʹvvel ååraž. Son vaalmštõõvvi jeäskka pâʹjjmättʼtõõttjen Âʹvvel lookkjiškooulâst, leša plaanin lie võl pueʹreed ärvvsaaʹnid da ǩeeʹrjted ođđ aunnsid čõõuč ääiʹj. Suu täävtõssân lij piâssâd Tampere-gåårad universitetta mättʼtõõttâd riikk-määtt politiikk tuʹtǩǩummuš prograʹmme. Ǥujo suʹst miõl ǩeäss politiikk årra, suʹnne šõõddi iiskâr õhttned nuõrisuåvtõʹsse Mäkinen lij tuåimmjam suåvtõõzzâst ouʹddel äʹšštobddjen. Son ǩeäčč puõʹtti pââʹjje äävai miõlin da vuârdd ooddin, što vuäinn eʹpet jeeʹres vuäʹzzlaid.
Harri Aslak Jomppanen
Harri Aslak Jomppanen lij Lemmenjooǥǥ ååraž. Son lij puäʒʒooumaž da jeällam Tuäivvnjaarǥ puäʒʒhoiʹddjeeiliinj. Son lij ååʹn vuõssmõs pââʹjjes nuõrisuåvtõõzzâst, koozz vuässõõttmõõžž suu taaurõõžž algg aalǥâst siâzztõʹlle. Puäʒʒoummu ämmat staanummuš motivâstt Jomppanen nuõrisuåvtõõzz tuâjast da såbbrid vuäitt puârast suânnʼjed õʹhtte puäʒʒhååmmivuiʹm. Nuõrisuåvtõõzzâst kooll jeeʹres nuõri di veʹrǧǧniiʹǩǩi vueiʹnnemkuuʹlmid vääžnai aaʹššid da seämmast peäss jiõčč mainsted jeärrsid jiiʹjjes vueiʹnnemkuuʹlmin.
Juuso Valle
Juuso Valle jäälast vueiʹvv-vuäʹzzest Karigasnjaarǥâst da vueʹssen Âʹvvlest, koʹst son jeäll lookkjiškooul. Lookkjiškooulmättjummši paaldâst son spraavdââtt luâtt- da pirrõs-sueʹrj vuâđđtuʹtǩǩõõzz Tuäivvnjaarǥâst. Valmštõõvvmõš kåitt eeʹjjest 2021, mõõn mâŋŋa Valle vuâlgg vueiʹtlvânji puäʒʒtäällsuârgga. Frijjääiʹj son âânn jäänmõsân puäʒʒhååmmin pâi čõõučâst ǩiiđ räjja. Valle tuʹmmji vueʹlǧǧed Nuõrisuåvtõʹsse mâŋŋa leäi saǥstõõllâm ääʹššest kuuʹǩǩ suu tobddsin, ǩii leäi siâzztõõllâm tuâi suʹnne. Nuõrisuåvtõõzzâst peäss tobdstõõttâd politiʹǩǩe da ođđ oummid. Seämmast tõt taʹrjjad kuâsttmõõžž tõõzz, mäʹhtt õhttsažkåʹdd jåårr. Aaʹššid vaikktummuš lij pâi pluss: muttâz jie šõõdd ǥõõi ij aaʹššid tuejjad mâiʹd-ne.
Mira Pohjanrinne
Pohjanrinne lij jälstam ouddâl Karigasnjaarǥâst. Son jäälast ååʹn Heʹlssnest, koʹst mättʼtââtt poliittlaž histoori valdiatiõđlast tiõđkååʹddest. Pueʹttiääiʹjest son haaʹlad toiʹmmjed konfliktträʹtǩǩummši kõõskâst. Son tuʹǩǩad mäʹtǩstõõllmõõžžâst da še jeeʹresnallšeeʹm kulttuurid tobdstõõttâd. Pohjanrinne vuõʹlji mieʹldd nuõrisuåvtõʹsse, ǥu tuâjj sääʹmaaʹšši kõõskâst ǩeäss suu miõl.
Helmi Ljetoff
Helmi Ljetoff lij aalǥâst jälstam Aanar Čeʹvetjääuʹrest, leša jäälast ååʹn Vantaa gåårdest. Son mättʼtââtt Tikkurila lookkjiškooulâst IB-liinjâst. Ljetoff lij älšmam õhttsažkååddla vaaiktem määŋgain ååʹblǩin di ouddmiârkkân jieʹllikaartin da porrmõõžž raajjmõõžžâst. Son haaʹlii mieʹldd nuõrisuåvtõʹsse, ǥu tõt lij fiin vueiʹtlvažvuõtt mättjed lââʹzz di piâssâd jiõčč mieʹldd vaaikted sääʹmnuõri aaʹššid. Tuâjast tobdstââtt tâʹl še jeeʹres nuõrisuåvtõõzz vuäzzlain.
Anni-Sofia Niittyvuopio
Sofe Hánsa Sampo Ánne-Sofe leʹbe Anni-Sofia Niittyvuopio toimmai nuõrisuåvtõõzz saaǥǥjååʹđteeʹjen vuõssmõs eeʹjj. Son lij 21-ekksaž, jäälast Karigasnjaarǥâst da mättʼtââtt puäʒʒhåiddmõõžž mättsuåppmõõžžin tuejjeeʹl seämma poodd tällõsvaaldâšm tuâjaid. Ouddâl nuõriväʹlddõʹsse mõõnnmõõžž son lij leämmaž Lääʹdd sääʹmnuõri halltõõzzâst kutt eeʹjj di leämmaž aktiivlânji čiǯǯbieʹll-leett tåimmjummšest mieʹldd. Son haaʹlad vuässõõttâd poliittlai tuʹmmstõõǥǥi tuejjummša nuõriväʹlddõõzz pääiʹǩ, ǥu tõʹst õhttan tääʹrǩes prååstai meer tåimmjummuš jeäʹrbi mieʹldd vueiʹnnlõõttmõõžžid veʹrǧǧoummuivuiʹm.